DILI, (TATOLI) – Vise
Ministra Solidaridade Sosiál no Inkluzaun (MSSI), Signi Chandrawati Verdial,
hateten terseira idade, inválidu sira no oan kiak por-volta 150 resin maka
asesu ona apoiu orsamentu hosi Governu.
Tuir nia iha 2018 governu aloka
milliaun $35 hodi halo pagamentu ba benefisiáriu no 2019 propoin iha Orsamentu
Jerál Estadu (OJE) 2019 milliaun $45 ba programa hirak ne’e.
“Totál benefisiáriu hamutuk 150
rihun resin hosi idozu, inválidu no bolsa da mae”, katak governante ne’e ba
jornalista sira iha Palásiu Governu, ohin hafoin enkontru Konsellu Ministru
estraordináriu.
Prosesu pagamentu ba daruak iha
2018 oras ne’e la’o ona iha munisípiu Baukau, Lautein no Vikeke, depois sei
kontinua aselera pagamentu iha munisípiu parte sul, klaran no oeste inklui
Rejiaun Administariva Espesial Oekusi-Ambenu (RAEOA) iha tempu besik.
“Ita tenta atu halo pagamentu
lalais ba munisípiu sira seluk no analiza teknolojia hodi fasilita pagamentu
ne’e ho lais liu”, tenik tan.
Nia esplika prosesu pagamentu
la’o bazea ba kalendáriu no tuir etapa, tanba ekipa servisu hosi Banku Nasionál
Komérsiu Timor-Leste (BNCTL-sigla portugés) laiha transporte sufisiente, liuliu
kareta banku movel hodi halo pagamentu dala ida iha teritóriu.
Kareta banku movel iha de’it
haat, tanba ne’e difikulta prosesu pagamentu. Mesmu nune’e governu sentrál
kontinua kontaktu ho administradór munisípiu no prezidente autoridade hodi
informa kona-ba oráriu pagamentu.
Jornalista: Agapito dos Santos | Editora:
Rita Almeida
Imajen: Vise-Ministra
Solidariedade Sosiál, Signi Chandrawati Verdial, iha ámbitu panorama orsamentál
2019 iha MF Aitarak Laran. Imajen Egas Cristovão
Sem comentários:
Enviar um comentário