PM Husu Ministériu Relevante Hadi’a Distribuisaun Bee-Moos

DILI, 15 jullu 2019 (TATOLI)—Vise Ministru Administrasaun Estatal, Abílio Caetano akompaña hosi asesór Tomás Cabral, hasoru malu ho Primeiru-Ministru (PM), Taur Matan Ruak hodi rona orientasaun ba distribuisaun bee-moos iha área rurál.

“Ami ko’alia kona-ba dezenvolvimentu fíziku no naun-fíziku. Ba fíziku iha tempu hanesan haree ba povu nia moris di’ak (bem estar) no ohin Primeiru-Ministru fó orientasaun ba ami para oinsá Ministériu Administrasaun Estatal (MAE) bele halo koordenasaun ho ministériu relevante atu hadi’a sistema bee-moos ba área rurál sira,” tenik Vise Ministru Caetano iha Palásiu Governu, segunda ne’e.

Nia dehan, ba sistema distribuisaun, Xefe Governu fó ezemplu ba rezervatóriu ne’ebé iha F-FDTL Metinaro.

“Primeiru-Ministru husu atu iha nível suku mós bele halo rezervatóriu ne’ebé boot, para depois bee ne’e mai ita rezerva barak kedas no kuandu to’o situasaun krítika ida bee bele iha nafatin. Entaun, Primeiru-Ministru orienta ami atu haree ida ne’e,” nia katak.

Tuir Governante ne’e, bee-moos iha relasaun ho povu nia moris di’ak, tantu iha sidade no área rurál sira hotu husu bee-moos, tanba ne’e, Xefe Governu husu koordenasaun ministériu relevante hodi bele moderniza sistema distribuisaun bee-moos.

Nia salienta, bee moos ba área rurál hanesan parte ida hosi Programa Nasionál Dezenvolvimentu Suku (PNDS) tanba agora dadauk PNDS nia infraestrutura báziku ne’ebé halo iha nível komunidade no suku sira mak irigasaun ki’ik, bee-moos no infraestrutura ki’ik sira.

Jornalista: Julia Chatarina | Editór: Xisto Freitas

Imajen: Vise-Ministru Administrasaun Estatál, Abílio José Caetano. Imajen Tatoli/António Gonçalves