Biografia Renan Selak: “Render Nunca a Não Ser Leva a Cabeça”

DILI, 11 setembru 2020 (TATOLI)—Saudózu Faustino dos Santos “Renan Selak” moris iha Aldeia Ira-Ara, Suku Fuiloro, Postu Adminsitrativo Lospalos, Munisípiu Lautém, iha loron 01 fulan maiu tinan 1957. Saudozu Faustino dos Santos “Renan Selak” oan hosi família “No Reci no Nuku Malai” nu’udar oan daruak hosi maun alin hamutuk na’in-haat (4) ne’ebé kompostu hosi feto na’intolu (3) no mane úniku mak saudozu Renan Selak.

Saudozu Faustino dos Santos “Renan Selak” hahú nia estudu iha eskola Pre-primaria iha tinan 1964 iha Eskola Munsipál de Lospalos. Hosi eskola pre-primaria munisipál de Lospalos refere mak saudozu hahú ho klase husi ABC to’o primeira klase.

Iha tinan 1965, Saudozu Faustino dos Santos “Renan Selak” kontinua nia estudu iha Colegio Fuiloro hahú hosi segunda klase to’o terseira klase. Iha tinan 1967-1968, saudózu muda fali ba eskola iha Acção Psico Social iha Kompanhia Caçadores Nu. 14 Lospalos. Hosi eskola ida-ne’e saudozu konklui ninia eskola ho Kuarta Klase iha tinan 1969.

Iha 1973-1974, saudozu Faustino dos Santos “Renan Selak” komesa tama ba iha servisu obrigatóriu militár nian iha segunda linha. Iha tinan 1975, bainhira Indonézia invade Timor-Leste, saudozu Faustino dos Santos tama iha Milísia Populár ne’ebé mak organiza hosi dirasaun da luta iha altura ne’ebá.

Durante baze de apoiu, saudozu Faustino dos Santos “Renan Selak” tama ba Forças Armadas da Libertação Nacional de Timor-Leste (FALINTIL) iha forsa intervensaun sai hanesan Komandante Seksaun hamutuk ho Komandante Gil Fernandes ho Fredrico da Costa Bere Nalai Lak.

Baze de apoiu rahun iha tinan 1978, depois de re-organiza fali forsa hosi Ponta Leste, saudosu Faustino dos Santos “Renan Selak” nomeadu sai nafatin hanesan Komandante da Seksaun. Saudozu Faustino dos Santos “Renan Selak” nia kódigu fou-foun ne’e “Mau-Loy” maibé hafoin de re-organizasaun, saudozu muda fali naran ba “Renan Selak” to’o nia hakotu iis.

Iha tinan 1980, saudozu Faustino dos Santos “Renan Selak hola parte nafatin iha forsa descamentos de guerrilha.

Durante iha funu laran iha tinan 1981, saudozu Faustino dos Santos “Renan Selak” forma família ho nia kaben ho naran dona Arminda Gonçalves. Hosi família ida-ne’e, Maromak haraik oan na’in-hitu (7) ne’ebé kompostu hosi mane na’in-tolu (3) no feto na’in-haat (4) maibé oan feto ida mate iha funu laran durante faze de guerrilha iha tinan 1982.

Iha tinan 1982, saudozu Faustino dos Santos “Renan Selak” iha forças concentradas sai hanesan Komandante Pelotaun, kaer kargu hanesan Komandante Pelotaun hahú hosi 1982 to’o mai 1985.

Iha fulan juñu tinan 1985, Komandante Falu Txai ho Komisáriu Mau-Velis mate, ho nune’e nomea fali saudozu Faustino dos Santos “Renan Selak” sai hanesan Adjuntu Lansadu ba iha Forças Armadas.

Iha tinan 1989-1990, saudozu Faustino dos Santos “Renan Selak” nomeadu sai hanesan Sekretáriu Rejiaun Um (1) Ponta Leste.

Iha tinan 1999-2001, saudozu Faustino dos Santos “Renan Selak” sai hanesan Segundu Komandante Primeira Kompania Rejiaun Um (1).

Iha tinan 2000, saudozu Faustino dos Santos “Renan Selak” sai hosi akampamentu Forças Armadas da Libertacao Nacional de Timor-Leste (FALINTIL) iha Aileu ba vida sivil.

Iha tinan 2007-2012, saudozu Faustino dos Santos “Renan Selak” sai nu’udar Vise-Prezidente ba Partidu Unidade Nacional Democrática da Resistência Timorense (UNDERTIM) no sai membru Parlamentu Nasionál iha segundu lejislatura.

Iha tinan 2017, hosi Kongresu Konsllu Veteranu Munisípiu Lautém nomea Saudozu Faustino dos Santos “Renan Selak” sai nu’udar Prezidente Konsellu Veteranu Munisípiu Lautém.

Iha fulan janeiru 2020, saudozu Faustino dos Santos “Renan Selak” nomeadu hosi Kongresu Nasionál Asuntu Veteranu nomea saudozu “Renan Selak” hodi assume kargu nu’udar Vise-Prezidente Konsellu Veteranu Nasionál.

Iha loron ida fulan setembru 2020, saudozu Faustino dos Santos “Renan Selak” hetan moras atakasaun iha saudozu nia rezidénsia iha Lospalos no loron ne’e kedas família lori ba sentru Saúde Lospalos hodi transfere mai hala’o internamentu (baixa) iha Hospital Nacional Guido Valadares (HNGV) iha Dili durante loron sia (9) nia laran.

Iha loron 10 fulan setembru tinan 2020, saudozu Faustino dos Santos “Renan Selak” hakotu nia viajen moris iha mundu ne’e iha tuku 11.30 iha HNGV Dili.

Adeus Aman Laran Luak.

Ó-nia espiritu FALINTIL ami kuda iha ami-nia fuan to’o mate.

TATOLI

Notísia Relevante:

Veteranu “Renan Selak” hakotuI’is iha HNGV, adeus erói TL