Iha loron-kinta ne'e, primeiru-ministru hatete ona katak hala'o hela investigasaun sira hodi hatene katak karik polísia timoroan sira ka ajente sira hosi parte indonéziu kolabora hodi permiti entrada ilegal hosi ema na'in 160 resin iha semana hirak ikus ne'e iha Timor-Leste.
"Investigasaun hala'o hela hodi hetan karik iha apoiu balun iha ne'e ka hosi parte indonéziu nian. Bainhira investigasaun hotu, no karik presiza, ami sei foti medida sira", Taur Matan Ruak hatete ba jornalista sira.
Xefe Governu ko'alia ba jornalista sira hafoin enkontru semanal ho Prezidente Repúblika, Francisco Guterres Lu-Olo, hodi analiza kestaun ne'e ho kestaun sira seluk, ho destake ba debate orsamental.
Bainhira kestiona hosi jornalista sira, primeiru-ministru admiti ona "preokupasaun maka'as" ida kona-ba númeru aas hosi entrada ilegal sira, hodi esplika katak ezekutivu estuda hela solusaun sira hodi hamenus situasaun ne'e.
Iha semana liubá, visi-ministru Interior, Antonio Armindo, hatete ona ba Lusa katak iha semana hirak ikus ne'e tama ona iha nasaun, tuir dalan ilegal, "ema na'in 160 resin", no kaer ona sira ho haruka ona ba fatin kuarentena nian.
Maski reforsu sira iha patrulla ho polisiamentu, ho instalasaun hosi postu foun sira hosi polísia fronteira nian, Armindo admiti ona katak presiza nafatin ajente sira ba rejiaun.
"Ami aumenta ona postu sira polísia nian. Ami la fó sai númeru hosi ajente sira ne'ebé iha ona rai laran, tanba kestaun sira seguransa nian, maibé presiza reforsa tan apoiu ba Unidade Espesial Fronteira (UEF) nian", nia refere.
Parte barak hosi kazu sira entrada ilegal nian iha relasaun ho membru sira hosi grupu sira arte marsial nian ne'ebé halo viajen to'o parte indonéziu nian hosi illa ba serimónia sira juramentu ho filiasaun nian iha organizasaun sira hanesan ne'e.
Taur Matan Ruak hatete katak kontribui ba entrada ilegal sira iha relasaun sira família nian iha populasaun sira iha fronteira, kestaun komérsiu transfronteira nian - ne'ebé iha família barak maka hela iha ne'ebá - no mós kestaun hosi arte marsial sira.
Iha grupu ikus ne'e, Taur Matan Ruak refere ba númeru boot hosi membru sira PSHT nian, grupu arte marsial boot, ne'ebé tama ilegal iha nasaun, ne'ebé hamosu "preokupasaun boot" ba Ministériu Fronteira nian.
Governante hatete katak autoridade sira reforsa hela kontrolu fronteira nian no iha diálogu ho lideransa hosi organizasaun hodi kopera hodi evita entrada ilegal sira ne'ebé aumenta risku daet komunitáriu hosi COVID-19 nian.
Nota katak númeru hosi ema infetadu iha mundu, inklui iha viziñu Indonézia, aumenta nafatin, Taur Matan Ruak rekorda katak Timor-Leste iha nafatin sorte iha matéria ne'e, ho de'it kazu pozitivu ida iha nasaun agora daudaun.
"Ita hotu tenki kontribui atu nune'e situasaun sei hanesan ne'e nafatin no la prejudika populasaun sira seluk", nia hatete.
"Ha'u apela ba ema hotu atu ajuda kontribui ba seguransa hosi sidadaun tomak", nia destaka.
Hahú hosi inísiu pandemia nian iha Timor-Leste, rejista de'it kazu konfirmadu hamutuk 27, sira hotu iha sintoma kmaan no barak hanesan asintomátiku, iha de'it ema na'in ida maka seidauk rekupera.
Maioria hosi kazu sira ne'e maka hanesan ema sira ne'ebé maka tama liuhosi fronteira rai nian.
Nasaun tama iha períudu dalima, loron 30 nia laran, ba estadu emerjénsia ne'ebé hotu iha inísiu fulan-Outubru, ho limitasaun sira hodi tama iha nasaun.
Sapo TL | Lusa
Sem comentários:
Enviar um comentário