AJAR REKOÑESE, ONG BALU LA KRÍTIKA GOVERNU TANBA SIMU OSAN

Organizasaun Noun Govermental (ONG) Asian Justice And Right (AJAR) rekuñese katak, dadauk ne’e ONG balu la krítika ona Governu, tanba simu osan bo’ot husi Governu kada tinan.

Diretur Ezekutivu AJAR, José Luis Oliveira informa esklarese katak, Prezidente da Repúblika nia estetmentu kona-ba NGO sira la krítika ona Governu tanba simu osan ne’e loos.

“Ida la kritika ne’e, sosiadade sivil ida ne’ebé lai, dalaruma Prezidente nia akuzasaun ne’e bele loos, maibé agora ita husu, sosiadade sivil ida ne’ebé mak simu osan bo’ot liu husi Governu,”dehan José Luis Oliveira ba JN-Diário iha nia kna’ar fatin Palapasu Dili, Segunda (05/10).

José Luis mós rekuñese katak, loos duni durante ne’e, NGO balu simu tiha osan husi Governu, lakohi krítika Governu, maibé la’os NGO hotu.

Tuir AJAR nia hatene katak, durante ne’e, entre sosiadade sivil hotu iha Timor Leste ne’ebé simu subsidiu husi Governu kada tinan, NGO rua mak simu osan bo’ot liu, maibé durante ne’e NGO rua ne’e nunka atu krítika Governu.

Maibé José Luis Oliveira dehan, nia labele temi sai naran NGO sira ne’ebé mak kada tinan simu osan bo’ot liu maibé la krítika Governu, ho rajaun katak, Governu mak bele fó sai NGO sira ne’e nia naran.

“Ami (AJAR) durante ne’e la krítika, ami ko’alia to’o ema odio tan ami, mais ami krítika nafatin,”katak José Luis.

Iha Parte seluk, Vice Diretur Judicial System Monitoring Program (JSMP), Casimiro dos Santos hatete katak, maske sosiadade sivil hetan subsidiu husi Governu mós, sira sei kritika nafatin buat ne’ebé mak la’o lalos.

“Sosiadade sivil, li-liu JSMP sei fó nafatin hanoin no kritika, maibé ho maneira ida ne’ebé mak diferente, ne’ebé la’os tanba simu osan husi Governu,”dehan Lasimiro dos Santos.

Casimiro esklarese lia hirak ne’e hodi hatan ba Prezidente da Repúblika nia deklasarasaun kona-ba, NGO sira agora dadauk la kirika Governu ona, tanba Governu fó sira osan kada fulan,

Antes ne’e, Prezidente da Repúblika hatete katak, sosiedade sivil sira agora ne’e, la krítika ona Governu, tanba simu osan husi Governu.cos

Jornal Nacional