XANANA HAKARAK PODÉR ABSOLUTA

Diretur Ezekutivu Asian Justice And Right (AJAR), José Luis Oliveira konsidera informasaun konaba rezignasaun Xanana husi pasta Ministru Planeamentu no Investimentu Estratéjiku ne’e hanesan boatus deit, maibé ninia (Xanan, red) hakarak manan podér absoluta iha Governu no Parlamentu iha eleisaun jerál 2017.

“Dalaruma nia soe hela isu ne’e para ita haree, tanba ninia intensaun ne’e, hakarak konsolida poder ba 2017 ne’e, nia hakarak hetan poder absoluta,” hateten José Luis Oliveira ba JN-Diário, iha nia knar fatin Palapasu Dili, Segunda (05/10).

Eis Primeiru Ministru (ex-PM) atual Ministru Planeamentu no Investimentu Estratéjiku, Kay Rala Xanana Gusmão hanoin atu rezigna-an ne’e iha fin de Novembru tinan ida ne’e, tanba kondisaun saúde.

Entretantu tuir informasaun ne’ebé espalla ona iha públiku ne’e katak, Xanana la’os atu rezigna husi Governu de’it, maibé atu rezigna mós husi kargu Prezidenti Partidu CNRT.

Maske nune’e Diretur Ezekutivu AJAR hateten katak, nia lafiar Xanana rezigna-an husi MPIE, tanba polítika Xanana nian ne’ebé ema hotu labele hatene.

“Ema ko’alia hanesan ne’e (rezignasaun Xanana), maibé ha’u sente ne’e rumoris de’it no ha’u seidauk rona rasik ho tilun,” katak José Luis Oliveira.

Taba ne’e, José Luis Oliveira dehan, nia lafiar Xanana atu rezigna-an husi Governu, tanba sestu Governu ida ne’e, nia rasik mak kria.

iha parte seluk, Sekretariu Jerál Partidu CNRT, Dionisio Babo mós esklarese katak, rezignasaun Xanana ne’e hanesan isu de’it no kestaun polítika, tanba nia rasik mós seidauk rona informasaun kona-ba ida ne’e.cos

Jornal Nacional