Estrutura Foun Partidu ASDT Sei Lori João Correia Cs ba Tribunál

Foin lalais ne’e, Konsellu Ezekutivu Nasionál (KEN) liu-hosi kongresu extraordináriu eleje ona estrutura foun partidu Assosiasaun Sosiál Demokrata Timorense (ASDT) ne’ebé lidera hosi Francisco da Silva alias “ManuRuin” (Prezidente) no NorbertoPinto (Sekretáriu Jerál).

Delegadu sira hosi munisípiu sanulu resin tolu (13) maka eleitu Francisco da Silva alias “Manu-Ruin” no Norberto Pinto.

“Ha’u mai hamriik fila fali partidu istóriku ne’e la’os atu halo diskriminasaun ba malu no atu haree de’it ba kór A ka B. Ne’e sei la tau iha fatin ne’e. Apartir hahú ohin ba oin partidu ASDT ida de’it  no partidu ASDT sei la rua,” Manu Ruin esplika ba jornalista sira iha Sede Nasionál ASDT Lecidere, Díli, Tersa (23/09/015).

Nia dehan sé no sé de’it maka hakarak atu loke partidu no harii partidu ne’e direitu. Demokrásia ema ida-idak bele hili maibé lakohi uza fali avo Xavi nia oin sai imajen ba mundu. Ne’e hatudu la di’ak. Estrutura foun ida ne’e lakohi. Sé karik maka hetan koligasaun ASDT ida ka bloku ASDT sei haruka polísia ba kaer depois maka sei lori mai sede nasionál maka foin lori ba hatán iha Tribunál.

Planu no programa ba oin, estrutura foun ida ne’e sei tún ba baze hodi reativa fila fali estrutura partidu nian. Iha tempu badak nia laran, sei fó tomada  deposse ba estrutura prezidenti eleitu no koordenadór eleitu iha munisípiu sira. Koordenadór partidu munisípiu ne’ebé hetan uluk tomada deposse maka Aileu, Ermera no Liquiça depois maka ba munisípiu sanulu 10 iha teritóriu Timor laran tomak.

“Ohin ami mai hamriik iha fatin lulik “sagradu”. Ida ne’e la’os ha’u maka fundadór ba prezidente partidu ASDT no proklamadór nasaun ne’e, maibé saudozu Francisco Xavier do Amaral maka proklama. Ha’u Francisco da silva lae. Ha’u mai somente asumi kna’ar no lidera partidu no halo moris fila fali de’itpartidu ASDT,” nia dehan.

Aleinde ne’e, patrimóniu partidu nian ne’ebé maka lideransa tuan partidu nian uza bele intrega dadauk ona. Patrimóniu hirak ne’e maka hanesan kareta, motór, projetór, laptop no relatóriu finanseiru ba estrutura foun bazeia lei ne’ebé maka vigora iha estatutu no konstitusaun RDTL nian.

“Iha tempu badak nia laran maka sei la intrega, instituisaun PNTL maka sei buka kaer no lori sira ba hatán tuir dalan justisa iha Tribunál. Labele uza patrimóniu partidu nian sai partikularmente. Ne’e prezidente foun lakohi,” Manu-Ruin realsa.

Tanba saida maka halo kongresu extraordináriu Nasionál hodi troka lideransa tuan partidu ASDT nian ne’ebé lidera hosi eis prezidente João Correia no eis Sekretáriu Jerál Vicente dos Santos, nia hatán, tamba laiha lejitimasaun.

Entretantu, portavos Manuel Amaral “Lulik” deklara durante tinan tolu 3 nia laran partidu ASDT ninia programa la ativu no lala’o atividade hahú iha tinan 2012 to’o 2015.  Hatudu katak eis prezidente João Correia no Sekretáriu Jerál Vicente dos Santos lakon direitu nu’udar sai  militante babain.

“Estrutura tuan partidu ASDT ne’ebé lidera hosi Eis Prezidente João Correia no Sekretáriu Jerál Vicente dos Santos laiha komitmentu ida ne’ebé maka di’ak. La la’o tuir no kumpri estatutu partidu nian haruka (artigu 26, 27 no artigu 28). Ida ne’e maka razaun fundamentál bazeia estatutu partidu no lei ne’ebé maka vigora iha nasaun Timor-Leste,” nia esklarese.

Antes ne’e, povu no militante rasik hakarak ezije kongresu extraordináriu hodi eleitu prezidente foun partidu ASDT nian. Delegadu kongresista hirak ne’e mai hosi munisípiu sanulu resin tolu 13 inklui Oe-Cusse hodi fihir figura di’ak partidu ASDT iha salaun CNE, Caicoli, Sesta (18 Juñu 2015). (mj8)

Matadalan