MILAUN 1 USD BA FORMASAUN PROFESORES

Ministeriu Eduksaun (ME) liu husi Institutu Nasional Formasaun do Desentes e Profesionais Edukasaun (INFORDEPE), iha tinan 2015 ne’e prepara orsamentu milaun 1 USD ba formsaun profesores.

Diretur Administrasaun, Finansas, Rekursus Humanus no Logistik INFORDEPE , Valente Xavier hatete, orsamentu ba tinan 2015 konforme sub misaun INFORDEPE husu ne’e kuaze milaun 3, maibe konforme husi volume orsamentu entaun redus tiha ba milaun 1 resin hodi halo formasaun ba profesores sira iha Timor laran ne’e.

“Orsamentu formasaun ba profesores sira iha tinan 2015 nian ne’e, konforme ami nia sub misaun ne’ebe mak ami elabora iha 2014 kuaze milaun 3 USD, maibe tanba kapasidade orsamentu ne’ebe Governu iha ne’e mos ba pakote fiskal nian, ita nia Governu prepara tinan tinan distribui ba ministeriu sira, tanba ne’e tinan 2015 ne’e orsamentu ba formasaun nian ami hetan deit milaun ida resin, ida ne’e mak INFORDEPE ezekuta hodi halo kapasitasaun ba profesores sira hahu husi nivel pre eskolar to nivel ensinu sekundaria,” dehan Valente ba jornalista sira iha INFORDEPE Balide, Kinta (01/10/2015).

Valente hateten, formasaun ba profesores sira ne’e normalmente halao iha Janeiru to’o Dezembru, maibe tanba tinan-tinan Governu sempre aprova orsamentu tarde, entaun sira nia programa hahu fali iha Abril no Maiu.

“Ami ezekutasaun orsamentu tarde, ne’ebe ami nia aktividades formasaun lao nafatin iha kapital Dili no mos kapital munisipiu to’o mos kapital postu administrativus, ne’ebe ezekuta ona 70% no hela deit 30%. Epsera katak to’o Dezembru bele ezekuta ona 90%,” Vicente hateten.             

Valente mos esplika katak, orsamentu formasaun ba professores iha tinan 2016 redus oituan la hanesan ona ho tinan 2015 nian, tanba redus ba miloens 1,3 USD, maibe ida ne’e sedauk final tanba sei hetan aprovasuan husi Konselhu Ministru. nia

Jornal Nacional