ANTÓNIO DA CONCEIÇÃO: MERENDA ESKOLAR LA’OS BUAT IMPORTANTE

Ministru Estadu Kordenador asuntu Sosiál no Ministru Edukasaun, António da Conceição hateten katak, programa merenda eskolar ne’e tuir loloos, la’os ema hotu tenki koalia tanba merenda eskolar la’os buat importante, maibé atu ajuda deit familia sira.

“Merenda eskolar dadauk ne’e sai problema bo’ot ne’ebé entidades hotu koalia. Maibé tuir loloos ita lalika koalia, tanba merenda eskolar ne’e la’os buat importante ne’ebé tenki obrigatóriu. Maibé ita hakarak ajuda tanba iha familia balun ne’ebé laiha oportunidade sira nia oan ba eskola dala ruma lahan ida, tanba ne’e mak Governu hakarak kria merenda eskolar para ajuda sira”, dehan Ministru Edukasaun António da Conceição ba Jornalista sira iha ME Vila-Verde Dili, Tersa (4/11), hodi responde ba preokupasaun públiku konaba programa merenda eskolar ne’ebé mak balun la’o no balun paradu tiha ona.

Ho preokupasaun públiku ne’ebé kestiona bei-beik problema merenda eskolar ne’e, Ministru António da Conceição hateten katak, tinan oin mai (2016) ME sei buka modalidade (menu, red) merenda eskolar ne’ebé di’ak liu hodi forñese ba eskola públiku sira, maibé la inklui ba eskola privadu sira tanba eskola privadu sira iha rasik ona sira nia modalidade merenda nian.

“Eskola públiku sira ne’e mak sempre hasoru problema tinan-tinan. Tanba tenkiser haruka osan ne’e ba eskola, ba konselho dos pais mak sira halo iha ne’ebá entaun ita sei iha difikuldade oituan. Depois dependensia ba produtu importasaun nian. Entaun ha’u hanoin ita tenki buka lai meius ruma ba iha tinan oin mai,” António da Conceição informa.ola

Jornal Nacional