Kazu Medicu Kura Moras Too Kura Gostu, TDD Sei Kontinua Julga iha Loron 18

DILI - Tribunal Distrital Dili sei kontinua halao julgamentu ba kazu violasaun seksual agravadu neebe involve medicu cubanu ho inisial FFM, hasoru pasienti VMS ho idade 18 iha loron (18/02) tuku 11:00.

Tuir official justisa neebe kaer prosesu nee hatete, tuir agenda neebe marka ona, julgamentu ba prosesu nee sei kontinua fali iha loron (18/02) tuku 11:00 hodi kontinua rona fali deklarasaun husi sasin sira.

Tuir akuzasaun husi Ministeriu Publiku katak, iha loron 23 Marsu 2015 lezada VMS nudar pasiente neebe hetan moras ran mutin ba halo konsulta iha hospital Gleno. Too iha hospital laran pasiente VMS hasoru arguidu, tanba nia mak hanesan medicu iha ospital refere. Nunee lezada esplika tuir moras ran mutin neebe nia sofre ba arguidu.

Depois rona tiha esplikasaun husi pasiente, arguidu haruka VMS hasai ropa tur iha meja leten hodi halao abuju seksual ba vitima.

Hotu tiha ida nee arguidu haruka lezada hatais fali ropa no hameno hela ba nia katak, moras ran mutin nee infeksaun ona. Tanba nee loron 25 mak mai konsulta fali, diak liu mai kalan deit. Nunee lezada mos fila ba uma.

Too iha uma, lezada toba la dukur tanba hanoin deit arguidu nia liafuan neebe dehan moras ran mutin nee grave los ona, tanba inveksaun ona. Ho ida nee iha dadersan loron 24 nee lezada ba fali konsulta nia moras ran mutin iha hospital refere.

Nunee arguidu dehan ba nia katak moras ran mutin nee diak liu halo relasaun seksual deit mak diak. Tanba la hatene, lezada mos halo tuir deit tanba nia nudar ema inosenti. Ho hahalok arguidu FFM nee ministeriu publiku akuza ho krime violasaun seksual agravadu neebe previstu iha artigu 173 kodigu penal TL. Informasaun kompletu iha STL jornal no STL Web, edisaun Sabado (30/1/2016). Domingas Gomes

Suara Timor Lorosae