RESEITAS DOMESTIKA SA’E BA 15%

Vise Ministru Finansas (MF) Helder Lopes hateten, reseitas domestika husi 10% sei hasae ba 15%.

“Alvu ne’ebe maka ita trasa ba reforma fiskal maka atu hasae reseitas domestika hosi 10% ba 15%, hosi PIB ba 2020,”esplika Vise MF Helder Lopes ba Jornalista iha Ministeriu Negosius Estranjeiru Praia dos Coqueiros Dili, hafoin abertura enkontru kona-ba reforma fiskal Kinta (28/06).

Helder Lopes esplika, iha reforma fiskal ne’e iha komponente tolu, ida maka politika tributaria, lei tributaria nos ikus liu maka kona-ba administrasaun tributarai.

Tanba   ne’e, Helder Lopes dehan, Komisaun Reforma Fiskal halibur staf hotu husi Diresaun Nasional Impostu atu halo diagnostika oinsa maka atu hadia tributaria, nune’e mos atu aprezenta rezultadu diagnostika ne’ebe uluk peritus sira ajuda Timor oan halo ona nune’e sira bele toman ho estratejia saida maka Timor oan sira hadia iha administrsaun tributaria.

Bainhira kaolia kona-ba hadia Adminsitrasaun tributaria, komponente barak maka presiza hadia hanesan rekursu humanu iha adminsitrasaun tributaria, estrutura ka organiku iha Adminsitrasaun tributaria ne’ebe refere liu ba Dirasaun Jeral Impostu, no mos kona-ba sistema ne’ebe Komisaun Reforma Fiskal sei utuliza hodi hala’o sira nia kna’ar.

Sistema refere liu-liu ba sistema IT ka sistema teknolojia ne’ebe sei fasilita Komisaun Reforma Fiskal nia servisu hodi sai efetivu no efikas liu.

“Ita koalia kona-ba impostu ne’e iha impostu dereta indreta, ba Dirasaun Jeral Impostu   liga ho impostu direta ne’e maka impostu salariu vensimentu, salariu hosi kompanha   ne’ebe selu nia rendimentu no impostu sira seluk, impostu indireta ne’e maka hosi Alfandega, kuandu ema haruka sasan mai hosi Portu no Aeroportu no fronteira,”haktuir Helder Lopes.

Nune’e fontes reseitas seluk ne’ebe maka importante ba Reforma Fiskal atu haree maka kona-ba selu eletrisidade, selu be’e no fontes sira seluk ne’ebe maka presiza atu esplora liu tan par abele aumenta nesesidade resitas.

“Ita iha ona estudu ida ne’ebe aprezenta kona-ba waihira ita atu muda   ita nia lei tributaria ne’e, mas menus tasa impostu sira ne’e ita atu trasa ba hira, ha’u fo izemplu ema ne’ebe maka simu salariu 500 mai kraik la selu impostu, salariu 500 ba leten sei selu impostu 10%, ita halo hela estudu,”tenik Helder Lopes.Avi

Jornal Nacional