domingo, 28 de agosto de 2016

Don Carlos: Povu maka Merese Simu Medalla Colar


DILI, (ANTIL)—Eis Bispu Administradór Apostóliku Dioseze Dili, Don Carlos Filipe Ximenes Belo, SDB, fó agradese wa’in ba Prezidénsia Repúblika ne’ebé atribui Medalla Colar “Ordem de Timor” ba nia. Maibé, nia dehan, loloos povu maka merese liu simu medalla ne´e.

“Agradese kondekorasaun ida ne’e maibé diviaser intrega ba povu ne’ebé iha ita nia knua sira. Sira ne’ebé moris dook hosi sidade no sira ne’ebé sei terus. Sira ne’e maka hetan defaktu méritu tanba sira maka luta apoiu ita,” Amu Belo dehan liuhusi nia deskursu iha seremónia kondekorasaun Medalla Colar iha Palásiu Prezidénsia Repúblika, Bairo-Pité, Dili, Sesta (26/8).

Amu Belo haktuir iha tinan 1994 bainhira vizita Suku Olbulu, Atsabe, Ermera, ema barak hakilar hasoru nia “Viva Timor-Leste, viva Xanana Gusmão no viva povu Maubere”.

“Enkuantu, joven sira sei foti liman hakilar ” viva”, ferik oan ida ne’ebé hatais tais tuir tradisaun Atsabe ninian, mama malus no songe tabaku iha ibun depois mai hakuak ha’u dehan nune´e, Bispu, biar ami ki’ak, han fatuk no rai rahun maibé ami lá husik atu ema sama ami nia ulun. Ami defende nafatin ami nia liberdade no ami nia independénsia,” Amu Belo relembra ho matanwen.

Premiadu Nobel da Páz hateten, tanba ema hirak ne’e maka ita serbi, ita serbisu no tanba ema sira ne’e maka ita ukun. Ne´e duni, Amu Belo husu ba Maromak atu sira ne’ebé ukun na’in hamutuk ho sosiedade sivíl no meius komunikasaun sosiál, fó liu atensaun ba setór hotu-hotu liu-liu ba maun alin sira ne’ebé moris iha knua-knua ne´ebé seidauk sente benefísiu hosi independénsia.

Ho medalla ne´ebé simu ona, lian ba ema lian laek ne´e promete sei serbi didi’ak ba povu no independénsia Timor-Leste. - Jornalista: Xisto Freitas / Editor: Gantry Meilana

Foto: Don Carlos (klaran) konversa ho Prezidenti Repúblika, Taur Matan Ruak (loos), molok husik hela Palásiu Prezidénsia Repúblika. Foto ANTIL/Xisto Freitas

Sem comentários: