Kazu Ainaro, PNTL Kondena Membru no Husu Deskulpa Ba F-FDTL no Família

DILI, (ANTIL) - Komando Polisia Nasional Timor-Leste (PNTL) husu deskulpa ba instituisaun F-FDTL no familia vitima membru F-FDTL, Lasaro Jose da Costa ne’ebe hetan tiru husi membru PNTL Minisipiu Ainaro, iha Sesta (26/08) kalan. Komandante Jeral PNTL, Komisariu Julio Hornay hatete, komandu sei hasai membru PNTL ne’ebe tiru membru F-FDTL, tanba komandu konsidera atuasaun ne’ebe mak nia membru komete grave.

“Nia (suspeitu) la serve atu servi instituisuan ne’e (PNTL), PNTL persiza ema ne’ebe serve ho dignu no profesional,” Komisariu Julio Hornau realsa iha konferensia imprensa ne’ebe halao iha Kuartel Jeral F-FDTL, Fatuhada – Dili, Sabadu (27/08). Tuir Komisariu Julio Hornay, membru ne’ebe la merese sai nu’udar polisia tenki hases hosi instituisaun atu nune’e instituisaun PNTL iha prestiziu ida ne’ebe mak di’ak no hetan konfinasa hosi povu no estadu. Insidenti ne’ebe mak akontese iha Ainaro, Komando Jeral F-FDTL ho PNTL jonsidera hanesan insidenti ne’ebe mak involve oknum PNTL nu’udar suspeitu no F-FDTL nu’udar vitima lao’s insidenti entre instituisaun PNTL ho F-FDTL.

Tamba ne’e, Komando PNTL foti medida kautelar hodi submete ba Tribunal Munisipiu Covalimaba primeiru interogatoriu, maibe antes’e hetan detensaun 72 oras. Aleinde ida ne’e parte disiplinar, komandu foti mos medida kautelar ba suspensaun preventiva signifika membru refere dezarmadu kedan, dezfardadu hodi atende nia prosesu. Ho dezisaun ne’ebe maka Komando PNTL hola ona liu hosi kolaborasaun servisu hamutuk ho Komando F-FDTL husu ba membru sira hosi instituisuan rua ne’e atu mantein servisu normal hodi asegura prestasaun servisu ba komunidade tomak no garante nafatin koordenasaun servisu iha terenu.

“Husu ba membru PNTL ho F-FDTL atu serve ita nia pobu ho dignu tuir regras servisu, tama instituisaun lao’s atu aproveita halo violasaun no tortura, hanesan bandalismu, maibe tama instituisaun atu serve povu no nasaun ida ne’ebe sosa ho ruin no ran,” Komisariu Julio alerta. Hodi dehan, instituisaun sei la lakon buat ida atu hasai nia membru sira ne’ebe la merese atu servisu iha instituisaun PNTL. Ba komandante sira ne’ebe nomiadu ona hahu ohin ba oin tenki brani foti medidas hasoru membru sira ne’ebe hatudu atetude bandalismu. Kronolojia Sexta (26/8) kalan iha expozisaun Ainaro akontese goza malu hosi pessoal F-FDTL ba iha membru Polisia ne’ebe fo seguransa expozisaun, ikus mai rezulta tiru hosi membru PNTL ba membru F-FDTL, Lasaro Jose da Costa hosi Komponente Tereste. Jornalista: Manuel Pinto / Editor: Gantry Meilana 

Foto: Júlio Hornay