PLP APOIU HAKOTU PENSAUN VITASIA

Deklarasaun Imprensa: PLP Apoiu Hakotu Pensaun Vitalisia

Dili, 27 Agostu 2016

Ba dala-uluk, iha biban kmanek ida ne’e, Partidu Libertasaun Popular (PLP) ho haraik a’an hakarak hato’o agradesimentu profundu ba suporta masimu iha nivel baze ne’ebe mak durante ne’e PLP simu ona husi povu doben Timor-Leste iha teritoriu tomak husi munisipiu to aldeia sira. Iha nível nasionál, PLP mos agrade tebes ba apoiu no motivasaun ne’ebe simu ona husi komponenti sosiedade Timor-Leste tomak hanesan Igreja, veterana/veteranu, joventude, akademiku, sosiedade sivil, estudante no entidade sira seluk tan inklui mos atensaun husi lideransa jerasaun 1975 no mos lideransa masimu partidu boot sira. Apoiu sira ne’e hatudu katak PLP nia prezensa lori duni esperansa foun ba Povu Timor-Leste ne’ebe mak durante ne’e hein hela alternativu kredível ida iha konjuntura politiku nasional nia laran. 

Iha kontestu tranzisaun jenerasional ne’ebe mak agora ne’e iminente atu akontese, PLP hein katak lideransa nasional jerasaun 1975 kontinua transmite imajen lider grande Timor-Leste, Saudozu Nicolau Lobato hodi nafatin sai nu’udar mahon no nu’udar mata-dalan ba jerasaun foun: nafatin hadook-an husi linguazen kroat, sá tan insultu no trosa; nafatin sai izemplu diak hodi serbi-povu no la preokupa ho asuntu deznesesariu sira, sá tan lakon-tempu saugate ba asuntu la-vale sira hanesan rumores iha media sosial. 

Hanesan forsa politika nasional, PLP interese liu atu involve-an iha debate konaba asuntu profundu sira ne’ebe iha impaktu direta ba povu doben Timor-Leste nia moris hanesan: ezekusaun orsamentu Estadu ne’ebe mak tinan-tinan aumenta ba be-beik maske ho impaktu ne’ebe mak infelizmente ita seidauk bele sukat; asuntu Pensaun Vitalisia; no oinsa atu lori instituisaun Estadu nian besik liu ba povu hodi serbi no hadi’ak povu nia moris. PLP defende nesesidade atu hamosu modelu dezenvolvimentu ne’ebe mak sustentavel ba ita nia rain, tanba ita labele ona kontinua ho modelu ne’ebe hakarak deit mak gasta orsamentu tinan-tinan no iha tempu hanesan laiha diskusaun seriu konaba rezultadu husi orsamentu hirak ne’e. Modelu prezente loke dalan ba lider politiku sira atu uza sira nia poder asesu ba Orsamentu Estadu hodi hala’o atividade Dezenvolvimentu Nasional hanesan tiha deit asaun karidade husi lider sira ba povu. PLP hakarak bolu atensaun husi sosiedade Timor-Leste tomak katak tempu to’o ona atu halo mudansa ba situasaun ida ne’e ne’ebe mak la-sustentavel! 

Nu’udar parte ba objetivu ida ne’e, PLP louva no defende absolutamente pozisaun Prezidenti Repúblika Demokrátika Timor-Leste, Eselensia Taur Matan Ruak iha asuntu importante sira hanesan: halakon Pensaun Vitalisia ne’ebe mak komponenti sosiedade Timor-Leste tomak konkorda ona katak, pensaun vitalisia nia rezultadu negativu tebes hodi haburas liu tan injustisa sosial iha Timor-Leste, no mos pozisaun no esforsu tomak atu hakbesik instituisaun Estadu ba povu liu-husi vizita ba suku sira iha teritoriu tomak. 

PLP fiar metin katak hadi’ak povu nia moris mak dalan úniku ba ita atu dignifika sakrifisiu sira ne’ebe halo ona husi ita nia eroi rihun-atus-ba-atus durante tempu rezistensia to’o hetan Ukun-Rasik-An. Ba ida ne’e mak PLP bolu komponenti tomak iha rai doben ida ne’e, mai ita hotu “Hamutuk Hisik Kosar Ba Moris Diak”. 

Viva Timor-Leste! 

Viva Povu Timor-Leste!

Viva PLP!

Abel Pires da Silva, Ph.D - Porta-Voz Ofisial PLP

Numeru telemovel: 7760 4444
Email: abel.dasilva@anu.edu.au

Vizita PLP nia situ PLP: www.plp.org.tl 

Vizita pazina Facebook PLP: https://web.facebook.com/Partidulibertasaunpopular/