Prizioneirus 648 Detein Iha Prizaun Gleno Ho Becora

Prizioneiru hamutuk 648 mak agora dadaun detein hela iha prizaun Gleno ho Becora, tanba komete krimi omisidio no komete iha kazu sira seluk.

Diretor Nasional Servisu Prisional no Reinsersaun Sosial, Helder Cosme Marcal Belo, hateten husi nain 648 ne’e, nain 541 detein iha prizaun Becora, 107 iha prizaun Gleno, ne’e hatudu katak involvementu ema iha aktu krimi kada tinan sempre aumenta.

“Ita hotu-hotu nia papel oinsa bele halo prevensaun ba krimi iha timor inklui mos papel media nian halo estrategia hodi redus ou prevene krimi,” Diretor Belo hateten, iha Dili.

Husi 648 ne’e, nia hateten sentensa iha nain 146, preventiva 488 e medida seguransa 14.

Husi prizioneirus nain 648, nia hateten sidadaun estrangeiru hamutuk nain 29 mak dadaun ne’e detein hela iha prizaun Becora no Gleno, kompostu husi feto nain 6 no mane nain 23.

Nia dehan, ema estrangeirus hirak ne’e mai husi Indonezia, Cina, Filipina, Australia, no sira tama prizaun tanba involve iha krimi omisidiu no droga.

Iha parte seluk Membru Parlamentu Cristovao Barros, husu ba sidadaun hotu-hotu tenke iha konsiensia atu hakribi violensia no aktivamente halo prevensaun ba konflito.

“Governu tenke haree mos ba situsaun sira ne’e, tanba kada tinan numeru ema tama kadeia tanba komete krimi ne’e barak, ne’e ladun diak,” nia preokupa.

Nia mos husu governu tenke habelar liu tan sosializaun lei ba komunidades atu sira iha konsementu hodi labele komete iha krimi.

The Dili Weekly