AS Ponta Leste Trava Cacusan CF Ba Meias Finais

DILI, (ANTIL) - AS Ponta Leste hakat ona ba meias finais hafoin halakon Cacusan CF iha oitavu finais Tasa 12 Novembru 2016, ne’ebé hala’o iha Estádiu Munisipál Dili, Kinta (01/9).

Vitória ne´e, AS Ponta Leste hetan iha penalidade tanba impata ho Cacusan CF ho skor 2-2 iha minutu 90 + adisionál tempu 2×15.

Kauza hosi Cacusan nia derota ne’e mai hosi jogadór estranjeiru ne’ebé Cacusan kontratu hanesan Moises Nazaret (95) no Elvis Harewan (15). Jogadór na’in rua ne’e falla hatama golu liuhusi xutu penaltu.

Cacusan ezekuta de’it golu rua ne’ebé mai hosi Salvador L. da Silva (21) no Juvenal Cardoso (31).

Entretantu, jogadór AS Ponta Leste susesu ezekuta bola. Golu haat ne’ebé lori AS Ponta Leste ba vitória atribui hosi Jorge Alves (17), Filipe Leite (24), Lourenço Ximenes (11) no Duarte Lemos (19). Tanba ne’e, AS Ponta Leste hakat ba meias finais ho skor 4-2.

AS Ponta Leste sei hasoru Dili Institute of Tecnology FC (DIT FC) iha meias finais, Domingu (04/9). Klubu haat ne’ebé oras ne’e iha ona meias finais maka hanesan AD SLB Laulara, DIT FC, Assalam FC no AS Ponta Leste. (Jornalista: Xisto Freitas/Editor: Otelio Ote)

Foto: Kontra ataka entre jogadór Cacusan CF no AS Ponta Leste. Foto ANTIL/Xisto Freitas