Ema Estrengeirus 483 Uza Vistu Turista Servisu Iha Timor

Ema estrangeirus 483, uza vistu turista hodi mai servisu inkui loke bisnis iha Timor,maioria husi nasaun vizinu Indonezia.

Komandante Operasaun Polisia Imigrasaun Vicente Gusmao, hateten hahu husi fulan Janeiru to’o Junu 2016 iha ema estrangeirus 483 mak uza vistu turista hodi hala’o servisu inklui loke negosiu iha timor hodi benefisia ba sira nia aan.

“Sira mai servisu iha area konstrusaun no balun pedagang kaki lima. Ami kaer sira no lori mai iha imigrasaun no prosesu tuir lei imograsaun nian, ” Komandante Gusmao hateten.

Nia hateten, hahalok ne’e viola prosedimentu lei imigrasaun azilium numeru 9/2003, iha artigu 118 ho 119, ne’ebe sei la autoriza sidadaun estrangeiru ida servisu uza vistu turista.

Nia informa, geografikamente numeru ne’ebe aas liu ne’e sidadaun Indonezia, Cina, Australia, Canada, Vietnam no Filipina.

Ema hirak ne’e, nia dehan prosesa hotu ona, balun haruka sira selu multa no balun liu husi prosedimentu abandona voluntariu, haruka sira voluntariamente fila ba sira nian rain.

Iha parte seluk Membru Parlamentu Jacinto Viegas Vicente, apresia ho servisu polisia imigrasaun ne’ebe konsege kaptura ema hirak ne’ebe viola lei imigrasaun Timor nian.

“Maibe ita triste, tanba ita nia sistema sei fraku entaun ema bele fasil tama ho numeru ne’ebe barak hanesan ne’e,” nia kestiona.

Tanba ne’e, nia husu ba governu atu haree ba dadus hirak ne’e sai hanesan referensia hodi bele muda sistema hirak ne’e, atu mais aperta nune’e ema labele tama mai arbiru.

“Tenke muda mekanismu sira ne’e, atu nune’e ema bele respeita ita nia lei,” nia sujere.

The Dili Weekly