AIR TIMOR IHA PROBLEMA, CITILINK DADA-na

Aviaun Citilink oras ne’e dadauk dada-an husi Timor Leste (TL), tanba problema internu iha ajensia Air Timor ninian ne’ebé afeta maka’as ba Citilink.

Vise Ministru Óbras Públika Transportes no Komunikasaun (MOP-TK), Inacio Moreira, informa katak, Air Timor ne’e, la’os operador aviaun, maibé nia hanesan ajensia ida hodi fa’an tiket aviaun nian.

Inacio hatutan katak, tanba Air Timor ne’e la’os operador aviaun, to’o agora aviasaun sivil Timor Leste nian seida’uk fó lisensa ba Air Timor.

 “Ha’u fó informasaun klean ba sira katak, problema ida Air Timor ne’e, problema internu sira nian, Governu labele tama to’o problemas internu hanesan sira infrenta dada’uk, to’o sira dehan, bankarota,” informa Inacio Moreira ba jornalista sira iha Parlamentu Nasionál (PN), Kinta (19/01), hafoin audensia ho Komisaun E PN, ne’ebé trata asuntu  Infraestruturas, Transporte no Komunikasaun, hodi ko’alia kona ba problema ne’ebé oras ne’e ajensia Air Timor hasoru.

Nia haktuir, Governu kria kondisoens hodi regulariza, para kualker investimentu ruma, ka vontade di’ak husi ema ruma ne’ebé hakarak mai investe, Governu bele fasilita.

Inacio hatutan, kazu Air Timor ne’e nia rejistradu hanesan ajensia ida ne’ebé fa’an tiket ou entre-aspas ka bele sai hanesan operador.

“Maibé autoridade aviasaun sivil to’o ohin loron, seida’uk emite lisensa ruma ba Air Timor ne’ebé hakarak hanaran-an dehan operador, tanba sira nia kondisoens laiha. Kondisoens laiha mak, sira laiha aviaun, halo nusa mak bele hanaran-an dehan operador, mas afinal Air Timor ne’e, la’os operador maibé ajensia ida,” relata Inacio.

Nia esklarese, kondisaun ne’ebé mak Air Timor iha mak fa’an  tiket de’it, sira aluga fali aviaun rua, ida husi Indonesia mak Citilink, no ida seluk husi Singapora mak Silk Air. Husi negosiasaun ne’ebé mak sira halo, ba futuru kuandu iha osan mak sira bele sosa aviaun rasik para sira bele sai hanesan operador.

“Mas infelizmente, sira nia perkursu ne’e la’o, la naruk ida, derepenti de’it sira tenki para tanba sira iha problemas finanseiras. Aviaun ne’ebé rezignadu husi Indonesia mai Timor Leste, rezignasaun ne’e, Estadu Indonesia mak husu mai Timor Leste, ita konkorda tuir Air Service Agreement (ASA) ne’ebé iha, ita fó lisensa para sira halo operasaun tuir kondisoens ne’ebé mak iha,” tenik Inacio.

Nia dehan, iha komentáriu barak ne’ebé hatete katak, presu aviaun ne’e sa’e maka’as, maibé informasaun ida ne’e lalos.

“Em prinsípiu, bileti ba aviaun ne’e sei normal, laiha problema, i ha’u hakarak informa de’it katak, aviaun Citilink nia la para, tanba Governu Timor Leste seida’uk hetan karta de kanselamentu rezignasaun aviaun Citilink mai Timor Leste, ita Governu Timor Leste tenki husu responsabilidade, ita hein katak, Citilink ne’e bele semo fali iha semana ida rua nia laran,” katak Inacio.

Nia dehan, tuir informasaun ne’ebé la’o iha públiku dehan, aviaun sira ne’e lahalo tan operasaun, maibé depois nia halo tiha esplikasaun, deputadu sira preokupa no hanoin katak, iha buat ruma ne’ebé la’o lalos.

“Ita nia liders partidu polítiku balu mós, halo komentárius iha media sosial, ha’u lee ne’e ladun di’ak,”informa Inacio.cos

Jornal Nacional