CM APROVA, PROTÓKOLU KOPERASAUN GOVERNU HO CCI-TL

Akordu protókolu kooperasaun entre Governu ho Câmara Comércio de Industria Timor Leste (CCI-TL) ne’ebé ho intensaun atu fó formasaun no garante kondisaun emprezáriu Timoroan sira, Tersa feira (17/1) aprova ona iha Conselho de Ministros iha Palásiu Governu.

“Reuniaun Conselho Ministros Tersa foin lalais ne’e, aprova protókolu koperasaun Governu ho Câmara Comércio Industria Timor-Leste (CCI-TL), ne’ebé maka aprezenta husi Ministro Estado Cordenador Assunto Economia (MECAE), ho Ministra Financas”, informa Secretario do Estado do Conselho de Ministros, Avelino Coelho ba jornalista sira iha Palásiu Governu, Kinta (19/01).

Avelino Coelho hatutan katak, konteodu akordu ne’e maka oinsa Governu bele fó formasaun ba emprezáriu sira, oinsa atu garante kondisaun ba sira, oinsa CCI bele prepara di’ak liu tan membru CCI nian, oinsa Estadu bele defini ona setores investimentu ne’ebé Timor maka tenkiser kaer, setores investimentu ne’ebé maka presiza halo koperasaun ho empreza husi rai liur i setores ne’ebé tenki taka duni ba empreza husi rai liur atu kaer.

“Protókolu ami aprova ona, entaun Ministériu kompetente oinsa maka hamutuk ho CCI atu haree knar saida maka atu halo. Maibé substânsia fundamental maka  atu kapasita emprezáriu Timoroan sira, tenki proteje sira, tanba ita kapasita tiha empreza Timoroan sira, empreza husi rai liur mai lori kapital bo’ot liu entaun emprezáriu Timoroan sira mate, tanba kompañia Timoroan sira labele kompete ho emprezáriu rai liur sira. Tanba ne’e maka Estadu presiza proteje oinsa setores produtivus Timoroan bele kaer, tenki Timoroan maka kaer, ne’ebé mak presiza halo parseria ho ema liur tenki parseria, ida ne’e maka intensaun iha protókolu ne’e,” Avelino Coelho fundamenta.

Avelino Coelho dehan tan, iha enkontru CM ne’e, MECAE mós aprezenta proposta dekretu lei rejistu komersiál, no aprezenta mós dekreitu lei serbisu i verifika serbisu emprezariál nu’udar  institutu públiku ida.

Maibé Avelino esplika, komu lei atu regula rejistu komersial sei iha  hela Parlamentu Nasional (PN), entaun dekretu lei ne’e mai halo aprezentasaun hodi Conselho Ministru bele komprende ninia dezenvolvimentu, kuandu lei investimentu liu ona mak foin aprova dekreitu lei ne’e atu regula.

“Asuntu rua ne’e aprovadu iha Conselhu Ministru ne’e,  tanba agora ita hatene maka SERVE maibe ho dekreitu lei ne’e fo liu tan nia kompetensia defini liu tan nia régras ba atuasaun ninian,” Avelino hatete.

Avelino Coelho mós esplika liu tan katak, alénde asuntu sira ne’ebé hato’o husi MECAE, iha reuniaun CM ne’e, husi parte Ministro da Educação aprezenta mós rezolusaun Governu ne’ebé aprova polítika edukasaun inkluziva, oinsa maka sistema edukasaun ne’e bele akomoda ema hotu-hotu.

“Ema hotu-hotu iha direitu hanesan, ba sira ne’ebé defisensia, kbi’it ekonomia la iha, oinsa maka sistema edukasaun ne’e bele serbi ema hotu hotu. Asuntu ne’e mós  aprovadu hotu”, katak Avelino Coehlo.des

Jornal Nacional