MARÍ REZEITA HADAU KAMERA JORNALISTA

Presidente Autoridade Região Autonomo Especial Oecussi Ambeno (RAEOA), Zonas Especiais Economia Social Mercado Timor-Leste (ZEESM-TL), Marí Alkatiri rezeita informasaun ne’ebé fó sai iha públiku katak, prende Jornalista STL nia kamera iha nia Ofice, iha Timor Plaza, iha Kuarta (15/2).

Marí Alkatiri kasu lia hirak ne’e ba Jornal Nacional Diário, iha telefone, Kuarta feira (15/2) tuku 20:45 (OTL), relasiona ho deklarasaun Jornalista STL ne’ebé hateten katak, Marí Alkatiri hadau jornalista STL) João Anibal de Almeida nia kamera, wainhira halo hela kobertura iha Mari nia ofice iha Timor Plaza.

Maibé Marí rezeita katak, informasaun ne’e lalós. Nune’e mós hatán kedas informasaun ne’e liu husi média sosiál, iha Facebook hanesan jornal ne’e kopia tuir mai ne’e.

“Ohin, Bainhira hau (Marí, red) sai meio dia husi hau nia Gabinete iha Timor Plaza hau haree kedas ema ida nebe’e hau la konyese ho kamera atu filma hau.

Hau dehan nia atu para. Nia para no hau hakbesik-an ba nia no husu nia entrega nia kamera. Bainhira hau kaer kamera ne’e hau husu ba nia nia se’e? Nia dehan nia ema STL. Hau husu fali se nia hasai ona buat ruma? Nia dehan lae.

Bainhira nia dehan lae, hau fo fila nia kamera no dehan ba nia katak hakarak koalia ho hau ba marka iha hau nia office. Labele halo emboskada mai hau.

Ba hau jonalista tenke iha etika. Ema hotu2 iha direito ba imajem. Halo emboskada ne’e falta de étika. Abrasus”.

Maibé husi sorin seluk, Jornalista STL, João Anibal de Almeida ne’ebé sente hanesan ofendidu, liu husi konferensia imprensa deklara katak, wainhira halo hela kobertura iha terrenu, atu konfirma konaba krítika Prezidenti Republika Taur Matan Ruak ne’ebé hatete katak projetu ZEESM hanehan povu Oecusi.

“Wainhira ha’u to’o iha nia (Alkatiri-red) uma, maibé nia laiha no seguransa sivil sira dehan Alkatiri ba ona nia office iha Timor Plaza. Entaun ha’u ba liu Timor Plaza ha’u hein iha ne’ebá kuaze oras rua nia laran, depois sira tun mai bar-barak ha’u foti kamera hodi foti imajen ou gambar. Depois Alkatiri dehan o halo saida, depois ha’u dehan ha’u atu foti gambar no konfirma loloos kona ba saida maka Prezidenti dehan katak, ita bo’ot implementa ZEESM iha ne’ebá depois ita bo’ot hanehan povu Oecusi. Depois ida ne’e Alkatiri mós hatan dehan la’e, ha’u halo servisu imi sira jornalista la’os jornalista maibé Azitador,” dehan João Anibal de Almeida ba Jornalista sira, iha nia knar fatin instalasaun STL Osindo-Díli, Kuarta (15/02/2017).

João Almeida hatutan katak, depois koalia tiha lifuan jornalista Azitador, Mari Alkatiri mós dehan dezarma tiha nia, entaun Mari Alkatiri rasik maka dezarma tiha kamera depois fó tiha ba eskoltu depois maka fó fila kamera ne’e.

Entretantu Sekretáriu Jeral Timor Leste Press Union (TLPU) Manuel Pinto konsidera, atuasaun prende kamera ne’e krimi, tanba hakerek ona iha lei komunikasaun sosial katak sé deit maka satan jornalista atu asesu informasaun iha fatin públiku ne’e krimi, no nia pena ne’e bele hetan kastigu to’o tinan 2 ou multa.

“Hanesan Sekretariu Jeral ba TLPU ha’u sente triste bo’ot tanba ema lider hanesan Mari Alkatiri ne’e maka la konsidera jornalista. Kapasidade jornalista ne’e di’ak ka aat maibé jornalista sira kontribui ba dezenvolvimentu ida ne’e, hanesan lider nasional mas taka dalan ba jornalista sira ne’e,” dehan Manuel Pinto liu husi telefone.

No Sekretariu Jeral TLPU mós promete iha loron rua nia laran (ohin no aban/Kinta-Sesta feira, red), sei ba hasoru vítima (João Almeida, red) depois koalia ho Conselho Imprensa (CI) hodi rejistu kazu ne’e iha CI.nes/ixo

Jornal Nacional Diário