segunda-feira, 20 de fevereiro de 2017

FOKUPERS APOIU KANDIDATU PREZIDENTI ANGELA FREITAS

Direktora ezekutivu  Fokupers, Marilia da Silva Alves hateten katak Fokupers fo apoiu ba kandidatu independenti Angela Freitas hodi kompete ho mane iha eleisaun prezidensial.

“Ami fo apoiu ba feto maluk ne’ebe iha korajen atu kandidata an ba prezidenti republika ba periudu 2018-2022 no ami la hare ba nia kor ou partidu saida, maibe nudar feto nia iha ona korajen atu kompete ho mane, maske sei iha hela prosesu, maibe nia hakarak ona avansa iha prosesu demokrasia ne’e rasik,”hateten Marilia da Silva Alves, ba JN-Diario iha Farol, Kuarta (15/02/2017).

Tuir nia Angela Freitas iha ona esperiensia konaba politika hotu iha TL e nia mos nudar prezidenti partidu trabalhista.

“Personalidade Angela Freitas hau ladun hatene barak, maibe nia mos konsege involve an iha politik no dalabarak ita haree nia mos sai iha media hodi fo apoiu ba prosesu balun hanesan prosesu Mauk Moruk nian,”dehan Marilia.

Nia fundamenta katak, prezidenti hanesan simbulu ou aman ba nasaun ida ho nune’e tenki kaer metin fiar no konfiansa hotu ne’ebe povu fo.

Fokupers iha programa prioridade haat

Iha oportunidade ne’e, Marilia informa  Fokupers iha programa prioridade haat ne’ebe sei implementa iha tinan 2017-2021 hanesan fo asistensia ba vitima, hadia mentalidade vitima, konsensializasaun ou edukasaun publiku no advokasia.

Maibe Fokupers aumenta programa foun hanesan fo edukasaun publiku ba kada familia ho objektivu hasa’e konsiensia familia liu-liu fen ho laen atu labele rejolve problema ho violensia hasoru feto.

“Dalabarak vitima husi kualker violensia sei nafatin moris iha trauma nia laran, tanba sira seidauk iha fatin hodi hamenus trauma liu-liu hirak ne’ebe fora husi uma mahon fokupers liu-liu ba feto maluk ne’ebe hetan trauma husi violensia iha tempu pasadu, nune’e ami iha planu atu estabele mos programa ou unidade trauma hiling hodi koopera ho asosiasaun psikolog TL , nune’e bele fo tulun ba maluk feto sira ne’ebe sei moris iha trauma nia laran,”dehan Marilia.  Ita

Jornal Nacional Diário

Sem comentários: