sábado, 11 de fevereiro de 2017

Orgaun Soberanu Tenke Asegura Estabilidade

PARTILHAR
DILI, (ANTIL) – Majór Jenerál FALINTIL-Forsa Defesa Timor-Leste (F-FDTL) husu ba orgaun soberanu estadu hanesan governu, parlamentu nasionál, tribunál no prezidenti repúblika atu asegura pás no estabilidade hodi atinji povu nia moris di’ak.

Lere Anan Timur hatutan iha seminariu ida ne’ebé organiza hosi Gabinete Primeira Dama iha Sentru Konvensaun Dili, Kinta, (9/2) katak, governu tenke ukun ho nasionalismu, patriotismu atu lori povu ba moris di’ak.

Hodi realsa, parlamentu bainhira halo lei tenke tuir realidade, kultura no tradisaun Timor. Parte Justisa, Lere husu halo justisa hanesan Timoroan julga ema Timoroan la’ós ema estranjeiru mak julga Timoroan.

Ba ukun nain, Lere bolu atensaun, kualker se de’it mak sai xefi governu hosi rezultadu eleisaun tinan ne’e tenke ukun tuir lei no kompeténsia.

Ulun boot forsa armada ne’e hatutan, moris di’ak importante ba forsa armada hodi hametin estabilidade, profesionalismu no disiplina.

Iha fatin hanesan Komandante Jerál Polísia Nasionál Timor-Leste, Júlio Hornay dehan papel polísia sei kontinua halo aprosimasaun ho komunidade sira hodi kria estabilidade no pás liuhosi ofisiál polísia suku.

Maibé ida ne’e de’it la to’o, tuir Júlio Hornay, bainhira laiha koperasaun hosi entidade hotu-hotu, hanesan sosiedade sívil, funsionariu, autoridade lokál ho povu, pás no estabilidade sei laiha. (jornalista: Manuel Pinto; editor: Gantry Meilana)

Foto: Majór Jenerál FALINTIL-Forsa Defesa Timor-Leste (F-FDTL), Lere Anan Timur akompaña hosi Prezidenti Komisaun Nasionál ba Eleisaun, Alcino Barris iha seminariu ida iha Sentru Konvensaun Dili, Kinta, (9/2). Foto ANTIL/Antonio Goncalves
PARTILHAR

Author: verified_user

Publicação luso-timorense sem fins lucrativos

0 comentários: