sábado, 11 de fevereiro de 2017

Governu Sei Rejista Tais iha UNESCO

PARTILHAR
DILI, (ANTIL) – Ministériu Komérsiu Indústria no Ambiente (MKIA) koopera ho PT. Artcha Indonesia no parseiru hanesan Fundasaun Oriente, Timor Aid, Cor Timor no Ministériu Turizmu Arte no Kultura hodi kria ekipa konjunta hodi tau atensaun oinsá mak bele rejista Tais Timor iha Organizasaun Nasaun Unida ba Edukasaun, Siénsia no Kultura (UNESCO) atu sai hanesan patrimónimu mundiál.

“Maibé, ita presiza prienxe kritériu balun, tanba ne’e mak kria ekipa konjunta atu aselera lalais prosesu ne’e tanba ita haree katak produtu barak mai husi rai-liur halo duplikasaun, ezemplu xineza balun halo duplikasaun tais ba karteira no buat seluk ne’ebé labele temi”, Asesór Dezenvolvimentu Indústria, MKIA, José Violante Reis ba ANTIL, Sesta (10/2) iha Fomentu, Dili.

José Violante kontinua, kritériu neen ne’ebé mak UNESCO fó ba Timor-Leste no kritériu ne’e presiza tempu naruk uitoan. “Ita-nia governu tenke deklara tais ho motivu husi Baukau, Lospalos, Marobo no seluk tan hanesan rikusoin ne’ebé lei proteje, ne’e hanesan kritériu ida atu submete ba UNESCO”.
Daudaun ne’e, ekipa Sekretária Estadu Arte no Kultura, MCIA, UNESCO iha Timor-Leste forma mós ekipa konjunta atu halo semináriu nasionál iha fulan-Marsu 2017 atu debate kona-ba tais Timor nian.

“Aleinde ne’e, ita hanoin no buka meiu atu prienxe kritériu sira ne’ebé UNESCO fó. Lalais liu, di’ak liután, tanba tais ne’e la’ós Timor mesak mak halo maibé nasaun viziñu mós halo produtu hanesan, tanba ne’e tenke buka meiu atu proteje ita-nia tais”, nia subliña.

Enkuantu iha semináriu fulan-Marsu ne’e, prioridade ba produtu tais de’it no sei konvida líder tradisional sira, soru-tais na’in hanesan tia sira iha munisípiu atu tau hanoin hamutuk hodi hetan rezultadu no intensaun ida de’it mak lori tais no rejistu iha UNESCO.

Hafoin iha semináriu ne’e rekolla ideia husi partisipante sira no termina bainhira mak Timor-Leste deklara kona-ba tais nu’udar patrimóniu nasionál no bainhira governu halo akordu ho tais na’in sira no lia-na’in tanba identifika ona motivu tais husi munisípiu balun atu halo sai hanesan propriedade nasionál nomós patrimóniu mundiál ne’ebé sei deklara iha UNESCO. (jornalista: Maria Auxiliadora; editora: Rita Almeida)

Foto: Tais de Timor
PARTILHAR

Author: verified_user

Publicação luso-timorense sem fins lucrativos

0 comentários: