terça-feira, 4 de abril de 2017

Kongresu EUA hakarak hatama Koreia-Norte iha lista hosi nasaun terorista nian

PARTILHAR
Kámara Reprezentante sira Estadus Unidus nian aprova ona iha loron-segunda petisaun ida ba Departamentu Estadu nian atu hatama fali Koreia-Norte iha lista hosi nasaun patrosinador sira terorizmu nian, ne'ebé hasai ona iha tinan 2008.

Ho votu hamutuk 394 konkorda no iha de'it votu ida kontra, Kámara Baixa adopta ona pedidu ne'ebé akontese semana balun hafoin Pyongyang hala'o tiha teste sira ba ‘rocket' interkontinental sira no misil sira, aleinde halo ensaiu nuklear sira.

Koreia-Norte sai ona hosi lista ba nasaun patrosinador sira terorizmu nian - ne'ebé halo parte hosi Sudaun, Síria ho Iraun - iha 2008, iha tentativu ida hosi Prezidente George W. Bush iha tempu ne'ebá hodi halo negosiasaun ba hasai arma hosi Pyongyang.

Iha lista hosi nasaun patrosinador sira terorizmu nian, ne'ebé halo hosi Departamentu Estadu, uluk halo ona parte mós hosi Kuba, Irake, Líbia ho Afeganistaun.

Kámara Reprezentante sira aprova mós, ho votu konkorda hamutuk 398 no votu kontra tolu, rezolusaun ida ne'ebé kondena programa norte-koreanu ba dezenvolvimentu hosi misil balístiku interkontinental ida.

Prezidente Kámara Baixa nian, Paul Ryan, hatete katak textu aprovadu rua ne'e reflete "medida konkretu sira" atu nune'e Koreia-Norte bele fó sai kona-ba sira nia asaun no kritika ona polítika hosi eis-prezidente Barack Obama kona-ba Pyongyang, ne'ebé nia klasifika hanesan "falladu".

Pedidu ne'e mosu liutiha fulan ida hafoin sekretáriu Estadu norte-amerikanu, Rex Tillerson, prezidi reuniaun hosi Konsellu Seguransa ONU nian kona-ba Koreia-Norte.

Estadus Unidus iha prezidénsia Konsellu Seguransa iha fulan-Abril, nune'e sei permiti ba Prezidente Donald Trump hato'o nia prioridade sira kona-ba polítika externa. Reuniaun kona-ba la-proliferasaun no Koreia-Norte sei halo iha loron 28 fulan-Abril.

Trump sei partisipa iha nia simeira dahuluk ho Prezidente xinés Xi Jinping iha Florida iha semana ne'e, no Koreia-Norte sei halo parte entre prioridade sira.

Washington hato'o nafatin kesar katak Xina la foti medida nesesáriu sira hodi "kontrola" Koreia-Norte, ne'ebé iha tinan liubá halo ona teste nuklear rua no teste ho misil balístiku hamutuk 20 resin.

Bainhira to'o iha ONU, Tillerson sei hasoru malu ho sekretáriu-jeral António Guterres, ne'ebé hatudu nafatin preokupasaun ho posivel diminuisaun hosi Estadus Unidus ba finansiamentu hosi organizasaun mundial.

Porta-vós ida hosi ONU hatete ona katak halo hela negosiasaun sira hodi organiza enkontro prezensial dahuluk entre Guterres ho Tillerson, maibé seidauk iha loron markadu.

Lusa - Foto@ Shawn Thew/EPA
PARTILHAR

Author: verified_user

Publicação luso-timorense sem fins lucrativos

0 comentários: