quarta-feira, 12 de abril de 2017

Portugal ho Cabo Verde aprezenta iha CPLP proposta hamutuk mobilidade nian

Prezidente portugés, Marcelo Rebelo de Sousa, fó sai iha loron-segunda ne'e katak Portugal ho Cabo Verde foin lalais ne'e aprezenta ona iha Komunidade hosi Nasaun sira Lian Portugés nian (CPLP) proposta hamutuk ida ba mobilidade iha luzofonia nia laran. 

"Hanesan dokumentu konjuntu ida, hanesan proposta hamutuk hosi Estadu rua, aprezenta ba sekretária ezekutivu CPLP nian, hodi bele hala'o debate, dahuluk iha termu tékniku sira no, hafoin ne'e, iha termu polítiku sira, debate ne'ebé bele sai importante iha simeira Praia nian iha tinan oinmai", Marcelo Rebelo de Sousa hatete bainhira hatán ba jornalista sira.

Xefe Estadu portugés ko'alia iha sidade Praia, iha konferénsia imprensa hamutuk ida ho Prezidente Cabo Verde nian, Jorge Carlos Fonseca, ne'ebé adianta ona katak dokumentu nia títulu maka "Fatin rezidénsia nian iha CPLP" no oferese "katak bele iha estatutu ida hosi sidadaun sira CPLP nian ne'ebé hela iha nasaun ida ka nasaun seluk, liuhosi prosesu ida ho faze".

Marcelo Rebelo de Sousa lakohi hatete kona-ba detalle sira, hodi argumenta katak "sei laiha elegánsia no hanesan tuir estratéjia sala boot ida" bainhira fó sai konteúdu hosi dokumentu ida ne'ebé "seidauk iha debate iha kuadru CPLP nian" no ne'ebé maka Estadu-membru sira seluk "seidauk koñese tuir dalan ofisial".

"Iha estatutu oioin, agora daudaun hanesan sedu indika pormenor sira, no hosi tratamentu jurídiku. Ideia maka atu bele hili hosi membru tomak CPLP nian, tanba ne'e maka aprezenta hamutuk hosi nasaun rua, ne'ebé konkorda ona, hodi hetan konsiderasaun hosi estadu sira CPLP nian", nia hatutan.

Iha deklarasaun ba jornalista sira, hafoin konferénsia imprensa ne'e, ministru portugés Negósiu Estranjeiru nian, Augusto Santos Silva, konfirma ona katak "Portugal ho Cabo Verde aprezenta ona iha loron balun liubá proposta hamutuk ida ba sekretariadu ezekutivu CPLP nian" ba "kriasaun hosi rejimi ida mobilidade nian iha ámbitu CPLP nian".

Sekretariadu ezekutivu CPLP nian agora sei konvoka reuniaun tékniku ida, tuir determina iha simeira Brazília nian.

Augusto Santos Silva refere katak, iha termu hosi proposta sira ne'ebé aprezentadu hosi Portugal iha simeira ne'ebé halo iha final tinan liubá, rejimi hosi mobilidade implika atu sidadaun sira hosi nasaun luzófonu sira "bele hetan benefísiu hosi autorizasaun hodi hela iha nasaun ruma hosi CPLP nian" no mós atu iha "rekoñesimentu di'ak hosi habilitasaun akadémiku sira no kualifikasaun profisional sira" no "portabilidade hosi direitu sosial sira".

"Xefe Estadu no Governu sira iha Brazília simu ona ideia no fó ona mandatu ba sekretariadu ezekutivu hodi serbisu, agora Portugal ho Cabo Verde, Estadu-membru rua hosi CPLP aprezenta ona dokumentu tékniku dahuluk ida hodi serbisu hosi membru sira CPLP nian", nia rezumi.

Santos Silva fó hanoin katak "buat ne'ebé atu kombina iha Brazília maka sei halo esforsu ida agora hodi haree karik rejimi ida mobilidade CPLP nian bele aprova iha simeira tuirmai, ne'ebé sei halo iha Cabo Verde, iha tinan 2018".

SAPO TL ho Lusa - Foto@ António Cotrim /EPA

Sem comentários: