Inan Aman Tenke Akompana Oan

DILI – Ministeriu Edukasaun (ME), rekomenda ba inan aman estudante ida-idak atu akompana oan sira ba eskola, preokupasaun nee relasiona ho konfrontasaun entre estudante husi Nobel da Paz no 4 de Setembru.

Tuir Direitor Jeral husi ME, Antoninho Pires katak, ME nia rekomendasaun ba estudante sira, mai eskola atu estuda laos buka problema, oinsa mak estudante sira bele kumpri regulamentu interna neebe mak iha eskola, no rekomenda ba inan-aman estudante sira tenke akompana oan sira ba eskola.

Ami nia rekomendasaun ba ita nia estudante sira katak, mai iha eskola  para atu estuda, no laos atu buka problema ba malu, oinsa mak estudante sira atu bele kumpri regulamentu interna neebe mak iha eskola, no husu rekomendasaun ba inan aman estudante sira tenke halo akompanamentu oan sira ba iha eskola, no fo hanoin ba estudante sira katak, ba iha eskola nee  para atu aprende buat ruma, maibe laos atu provoka malu,” dehan DJ  Antoninho ba STL iha edifisiu ME Vila-Verde, Dili, Tersa (11/04/2017).

Antoninho akresenta, ME sei haree eskola, tanba hanesan deklarasaun husi direitor Nobel da Paz katak, atu bele tuur ou koalia hamutuk ho direitor eskola 4 de Setembru, oinsa mak atu haree no rezolve asuntu nee.

Iha sorin seluk, Merita de Jesus, hanesan estudante terseiru ano husi Nobel da Paz hatete, problema nee mosu desde Kinta liu ba, maibe kontinua mosu tan loron Sesta nee. Bainhira remata ezame, estudante sira komesa hein malu iha lampu merah, inklui cek bemo sira nee, hodi estudante husi eskola  rua sadik malu, maibe hein katak, problema nee sei iha nia dalan para atu rezolve. Jacinta Sequeira/Guilhermina Franco

Suara Timor Lorosae