quarta-feira, 12 de abril de 2017

KAK Kontra PN Kompara Produtividade Servisu

DILI: Komisaun Anti Korrupsaun (KAK) rejeita total ho deklarasaun deputadu parlamentu nasionál nian hodi halo komparasaun servisu ho instituisaun sira seluk.

Komisáriu KAK, Adérito Tilman la aseita ho deklarasaun membru parlamentu katak tinan ne’e KAK la produtivu, tanba investigasaun ne'ebé KAK halo menus liu kompara ho servisu Polisia Servisu Investigasaun Kriminál(PSIK).

“Haree ba tinan ida ne’e produtividade servisu KAK nian la aumenta, la hamenus, iha balansu. Saida mak deputadu sira hato’o, ha’u haree la loos”, dehan nia, iha Uma Fukun PN, horisehik.

Tuir nia, deputadu sira haree produtividade KAK nian la atinji investigasaun kazu 100 ne’e. Maibé labele kompara ho PSIK ne’e diferensa, tanba kompeténsia servisu KAK nian akontese iha servisu ezersísiu funsaun publika de’it.

“Ita kompara ho PSIL kompeténsia ne’e haree ba kazu hotu. Intervene KAK nian haree de’it ba ezersísiu funsaun publika. Laiha rasionál ita ezije KAK tenke tinan ida halo investigasaun ba kazu rihun ida. Ne’e la lojika”, Aderito afirma.

Servisu KAK Timor nian la hanesan ho KPK iha Indonézia. KAK iha kompeténsia halo investigasaun de’it, depois haruka ba ministériu Públiku. Dala barak ema halo konfuzaun servisu KAK nian ho KPK nia servisu.

CAC halo servisu iha kooperasaun ho ministériu públiku. Iha 2016, KAK simu kazu delegasaun husi MP iha 26. Iha kazu ualu (8) pendente husi 2015 nian hamutuk 34. Husi kazu ne’e 29 mak KAK finaliza ona no haruka ba MP. Oras ne’e iha ona akuzasaun kazu hitu (7), tolu (3) mak MP arkivu. Metade husi kazu ne’e MP sei halo dilijénsia komplementár.

Independente

Sem comentários: