Faan Konbustivel, Domina Estranjeiru

DILI – Reprezentante povu iha uma fukun Parlamentu Nasional PN, preokupa tebes ho lisensa negosiu neebe maka Governu fo ba kompania Nasional no Internasional loke pertamina ou faan konbustivel iha rai laran, realidade kompania Internasional maka Domina faan konvustivel.

Ami preokupa tanba pertamina ou faan mina konbustivel rai laran nee, barak liu maka kompania Internasional no Timor oan laiha, governu tenke haree hodi fo oportunidade ba Timor oan tanba ema rai liur kuandu problema ruma sira halai sai ba sira nia rai ona maibe Timor oan lae, tan nee governu tenke haree,” dehan Deputadu Francisco Miranda Branco liu husi, Sesasun plenaria Tersa (11/04/2017) iha PN.

Nia mos informa liu tan katak, pertamina ou fatin faan mina konbustivel sira nee, kuaze ema estranjeiru nian deit tanba nee, sira halo manipulasaun mos, Timor oan la halo buat ida, dala ruma mina la too letru ida, ho problema sira hanesan nee presiza atensaun tebes husi governu.

Iha fatin hanesan Deputadu Agostinho Lay mos hatutan katak, nain ba Pertamina iha Dili laran domina ema rai liur tanba TL adopta hela Sistema merkadu livre, tan nee labele taka dalan ba sei deit atu mai investe iha rai laran.

Hau hanoin Timor oan sira la hola parte iha atividade nee tanba deit, too agora Kompania Timor oan sira sei infrenta hela problema boot ida maka, susar atu asesu ba kreditu, sekare ema neebe mai investe iha rai laran nee, mai ho sira nia osan kedas tanba nee maka partisipasaun Timor oan nian iha atividade sira hanesan nee menus, tan nee ita labele preokupa,”informa Deputadu Lay.

Nunee mos Deputadu Adriasno Joao hatutan, atividade faan mina konbustivil iha rai laran domina kompania rai liur, laos tanba governu fo prioridade liu ba ema liur maibe Timor oan maka lakohi atu hola parte iha atividade sira nee.

“Ita haree kompania Timor oan sira nee maioria hakarak kaer deit maka projetu konstrusaun sira nee, duke faan mina iha rai laran, ita labele fo sala ba kompania Internasional sira neebe maka mai halo atividade iha ita nia rai laran, tanba Timor oan maka lakohi atu hola parte iha atividade sira hanesan nee,”informa nia. Madalena Horta

Suara Timor Lorosae