quarta-feira, 12 de abril de 2017

ONU alerta katak ema barak bele mate tanba hamlaha iha Áfrika no iha Iémen

PARTILHAR
Komisariadu Aas hosi ONU ba Refujiadu sira (UNHCR) alerta ona iha loron-tersa ne'e ba risku hosi ema mate barak tanba hamlaha iha Horn of Africa, iha Nijéria no iha Iémen.

ONU lansa avizu ne'e hodi "haree ba rai-maran ne'ebé afeta mós ba nasaun viziñu sira (hosi Horn of Africa no Nijéria) no falta finansiamentu, ne'ebé halo sai todan hanesan mós krizi humanitáriu ida ne'ebé bele evita (…) maibé sai hanesan inevitável", deklara hosi porta-vós ida UNHCR nian, Adrian Edwards, iha kontaktu ida ho imprensa iha Jenebra.

"Aumenta ona risku hosi mate barak ne'ebé provoka hosi hamlaha entre populasaun sira iha Horn of Africa, Iémen no Nijéria", nia adianta.

ONU tauk katak situasaun bele sai aat liu duké durante hamlaha tinan 2011 nian ne'ebé oho ona ema liu 260.000 iha Horn of Africa.

Situasaun atual hanesan rezultadu hosi fatór oioin: rai-maran, falta osan no konflitu sira, ne'ebé halo deslokasaun iha grupu barak, explika hosi Edwards.

Somália, Sudaun-Súl, Nijéria ho Iémen hasoru rai-maran maka'as ida, nune'e mós konflitu armadu sira.

ONU husu ona ba komunidade internasional osan dolar biliaun 4,4 hodi hasoru hamlaha ne'ebé ameasa hela nasaun sira ne'e.

To'o agora, ONU simu de'it 21% hosi fundu sira ne'e ka osan hamutuk dolar millaun 984, hatete hosi porta-vós ida hosi Gabinete Kordenasaun hosi Asuntu Humanitáriu sira, Jens Laerke.

Iha Sudaun-Súl, ema besik 100.000 resin hamlaha no ema millaun ida resin bele hasoru hamlaha, hatete hosi UNHCR.

SAPO TL Lusa
PARTILHAR

Author: verified_user

Publicação luso-timorense sem fins lucrativos

0 comentários: