Ohin, ME Organiza Kongresu Nasionál Edukasaun

DILI, (TATOLI) – Ministériu Edukasaun (ME), ohin, segunda (15/05) organiza kongresu nasionál datoluk edukasaun nian, iha salaun Lalini- Larigutu, CNE (Comissão Nacional Das Eleições), Dili.

Kongresu ne’e hala’o atu asegura koerénsia, kontinuidade no komplementaridade husi polítika no planu ba médiu no longo prazo iha setór edukasaun.

Iha ámbitu hodi ko’alia kona-ba diretrize no liña orientadora sira hodi iha efikaz no efisiénsia ba konkretizaun vizaun edukasaun ne’ebé hatuur iha Planu Estratéjiku 2011-2030.

Tema ba kongresu nasionál ne’e mak: “A educação é o pilar da consolidação da identidade e do desenvolvimento da nação” no halo abertura direta husi primeiru-ministru, Rui Maria de Araújo.

Kangresu datoluk ne’ebé sei termina iha kuarta, (17/05) sei halo diagnostiku husi grupu tékniku sira ba área xave neen importante mak kuríkulu nasionál ensinu nian, jestaun no formasaun ba profesór sira, administrasaun no inspesaun eskolár.

Inklui, área infrastrurura, ekipamentu no rekursu edukativu, jestaun ensinu superiór públiku no privadu nomós partisipasaun inan-aman, komunidade no setór privadu sira inklui parseiru sira seluk tan.

Diagnóstiku sira ne’e hala’o ho objetivu atu identifika obstakúlu sira ne’ebé mak setór edukativu hasoru no halo rekomendasaun hodi halo rezolusaun ba diagnóstiku sira.

Prosesu diagnóstiku sei involve parte estadu no governu nian sira husi prezidénsia repúblika, membru governu, konferénsia episkopál timorense no konfisaun relijioza sira seluk.

Tuir mai, organizasaun naun governamentál (ONG), kooperasaun internasionál sira, sindikatu profesór sira, órgaun komunikasaun sosiál, setór privadu, sosidade sívil (Renetil, TL Coalition for Education no seluk tan), ensinu superiór públiku no privadu inklui parlamentu nasionál.

Entretantu, kongresu nasionál edukasaun dahuluk hala’o ona iha tinan létivu 2003 no daruak halo iha tinan létivu 2007.

Jornalista: Rafy Belo | Editora: Rita Almeida