terça-feira, 16 de maio de 2017

Jogadór Ghana Rua Reforsa Zebra FC

DILI, (TATOLI) — Zebra FC  kontratu ona jogadór estranjeiru hosi Ghana na’in rua atu reforsa klube refere iha segunda faze jogu primeira divizaun Liga Futeból Amadora (LFA) époka daruak ne’ebé sei hahú hikas iha 2 juñu 2017.

Jogadór rua ne’e ho pozisaun avansadu no defeza no sei to’o Timor iha sesta (19/5). Avansadu ne’e atu substitui jogadór brazileiru, Marcos de Lima ne’ebé fila hikas ona ba iha nia rain maske kontratu ho Zebra seidauk ramata no ida seluk defeza ne’e atu substitui liña defeza ne’ebé fraku.

“Agora ita prepara buka jogadór sira. Ita sei lori avansadu foun no defeza hosi Ghana. Iha 19 maiu sira sei to’o Timor”, Prezidente Zebra FC, Abrão Gabriel Santos Oliveira ba Ajénsia TATOLI via telefónema iha Dili, Tersa ne’e.

Nia informa katak nia sei halo mudansa radikál ba liña antigu tanba la konsege lori Zebra sees dook hosi zona dezpromosaun (degradasi).

Iha jogu primeira faze ne’e, Zebra joga dala hitu maibé hetan de’it pontu 6.

“Ami sei halo mudansa ba defeza, médiu no avansadu. Tarjetu ne’e sei hasai jogadór hamutuk ema na’in 13″, Abrão haklaken.

Emprezáriu baucau-oan  ne’e hateten iha semana ne’e nia laran jogadór sira sei konsentra atu hahú hikas treinu ba jogu tuir mai no nia garante katak liña segunda faze nian sei di’ak liu nomós sei lori adeptu barak ba kampu.

Jornalista: Xisto Freitas | Editora: Rita Almeida

Foto: Ekipa Zebra. Imajen dok.

Sem comentários: