PTR NO PJR ENTRE MERITUS NO LOYALIDADE…!!!

Jornal Nacional | editorial

Presidente Republika, Taur Matan Ruak nomeia ona juiz  Deolindo dos Santos sai Presidente Tribunal Rekursu hodi troka Guilhermino da Silva tamba problema saude, nunee mos estende mandatu Prokurdaor Jeral da Republika, Jose Ximenes ba tinan hat mai.

Nomeiasaun ba Prezidente Tribunal Rekursu no Prokurador Jeral da Republika nee kompetensia Prezidente Republika nian tuir mandatu konstituisaun artigu 86 ( kompetensia kona-ba orgaun seluk iha alena i) foti Prezidente Tribunal Supremo Justisa no fo poses ba Prezidente Tribunal Superior Administrativu, Fiskal no kontas nian,  no alenia k) foti Prokuradór-Jerál Repúblika nian hodi hala’o knaar iha tinan ha’at nia laran; l) Foti no hasai Adjuntu Prokuradór-Jerál Repúblika nian sira tuir termu sira No.6. artigu 133 nian.

Antes nee deputado sira iha Parlamento Nasional sujere ba Presidente Republika, Taur Matan Ruak katak nomeiasaun ba Presidente Tribunal Rekursu no Prokurdaor Jeral da Republika hela  ba Presidente Republika eleitu, Francisco Guetrres ‘Lu-Olo’ mak nomeia tamba mandatu besik ona atu remata.

“Situasaun ida ne’e ami hanoin katak, so Xefi Estadu foun mak bele nomeia, agora iha periodu ida ne’e, karik di’ak liu para iha viklu ba legal aban bainrua kuandu akontese buat ruma iha dalan ba magistradu na’in rua ne’e, Xefi Estadu foun bele iha poder atu bele hasai desizaun ruma,” Francisco Branco.

Nunee mos, Prezidenti Komisaun A, ne’ebé trata asuntu leis no poder local, Carmelita Moniz mós dehan, durante ne’e, inspesaun ba magistratura judisial foin mak dala ida. Tan nee sujere, nomeia de’it interino ida hodi substitui Prezidenti Tribunal Rekursu.

Sujestaun sira nee iha lian portugues bolu ‘provérbio’ ka ‘pepatah’ dehan ‘anjing ‘menggongong kafilah berlalu’ singifika katak deputado sira iha Parlamento Nasional prokupa maibe Presidente Republika la rona preokupasaun sira hodi toma nafatin dezisaun, nomeia Presidente Tribunal Rekursu no Prokurador Jeral da Republika.

Agora duvida mak nee saida mak Presidente Republika eleitu, Francisco Guterres ‘Lu-Olo’ sei halo hafoin tomada de posse? Li-liu kabe ba artigu 86 konstituisaun konaba  kompetensia Presidente Republika nia ba ba orgaun seluk iha alenia i,  k no alenia l.

Los duni, Prezidente Republika, Taur Matan Ruak  iha direitu konstitusional hodi nomeia Prezidente Tribunal Rekursu no Prokurador Jeral da Republika maibe problema mak mandatu Presidente Republika Taur Matan Ruak nee hela deit loron hirak atu husik kadeira numeru um nee.

Agora problema mak laiha lei ida bandu Presidente Republika atu labele foti desizaun politika ruma iha tempo hanesan Presdiente Republika sesante, sa tan mandatu Presidente Tribunal Rekursu sei too Marsu tinan 2018.

Presidente Republika nomeia Presidente Tribunal Rekursu no Prokurador Jeral da Republika, laiha duvida konaba profesionalizmu iha judisiariu nian maibe nomeisaun nee mos bele baseia ba loyalidade.

Karik, Prezidente Republika eleitu, Lu- Olo iha ema reserva atu sai Prezidente Tribunal Rekursu no Prokurador Jeral Republika maibe tenki hein too mandatu majistratura judisiariu  nain rua nee remata. *