sexta-feira, 23 de junho de 2017

Dialogu Iha Bobonaro, Alkatiri: AMP-Bloku Halo Sasan Blokiadu

PARTILHAR
BOBONARO – Durante Governasaun AMP no Bloku Koligasaun kaer ukun halo sasan blokiadu hotu, tanba gasta orsamentu barak hodi hadia infraestrutura iha rai laran, maibe infraestrutura kontinua aat ba nafatin.

Kestaun nee Sekertariu Jeral partidu FRETILIN Mari Alkatiri hatoo, bainhira iha Kampania partidu FRETILIN ba dala tolu ho tipu dialogu ho komunidade sira iha Postu Administrativa Bobonaro, Munisipiu Bobonaro, Kuarta (21/06/2017) .

Sekjer partidu FRETILIN Mari Alkatiri hateten, Durante tinan sanuluh Governu Aliansa Maioria Parlamentar no kontinua ho Bloku Koligasaun halo sasan blokiadu hotu, tanba gasta orsamentu barak, hodi hadia infraetrutura iha rai laran, maibe Estrada iha Postu Adminsitarativa Bobonaro aat nafatin.

Bobonaro nee ia Estrada nee maka aat ba bebeik, hau laespera katak osan barak ita gasta hodi hadia infaestrutura, durante tinan 10 AMP, tuir mai Bloku halo sasan blokiadu hotu, tanba ema konfu nain sira maka barak iha Governu nee,” dehan Sekjer partidu FRETILIN.

Iha biban nee Sekertariu Jeral Partidu FRETILIN Mari hateten, Vota iha eleisaun mai para FRETILIN manan hodi hadia Hari, Haburas, Habelar, Hametin No Hamos.


Ita manan iha eleisaun mai, sei hadia saida maka naksalak tia ona iha politika no sistema neebe maka iha,” dehan Sekjer partidu FRETILIN.

Konaba hari Sekjer Partidu FRETILIN Mari hateten, Hari saida maka haluha tiha hanesan boa Governasaun, justisa social (habitasaun komunitaria).

Nunee mos konaba haburas, atu hametin liu tan paz no estabilidade iha rai laran, tanba FRETILIN maka autor ba paz no estabilidade. Alende nee mos atu hamtin soberania nasional no Estadu de direitu inklui justisa, no hamos Korupsaun, koloksaun no nepostismu neebe maka iha durante nee.

Portantu vota ba partidu uluk hamutuk iha AMP tuir sekjer Partidu FRETILIN Mari katak, Maka sira sei kontinua fakar osan saugate, halo KKN no sei halo Governasaun ida neebe maka sabraut liu tan.

Tanba nee maka vota ba FRETILIN Manan para hadia Edukasaun, Saude, Agrikultur, Turismu , kria kapital fundu pensoens, kria fundu nasional dezemvolvimentu, kria sosiadade nasional de dezemvolvimentu, no implementa politka de inkluzaun uma familia.

Eis Primeiru Ministru iha Primeiru Governu Konstitusional nee haktuir tan katak, Bainhira ema ruma mai iha Bobonaro lori osan mai fo, simu tia osan nee depois vota ba FRETILIN, tanba osan nee laos sira nian, osan nee povu nia.

Iha fatin hanesan eis Reitor UNTL Armindo Maia hateten,”Politika neebe iha planu estrateziku neebe ita hare diak tebes, liu liu ida konaba hadia infraestrutura nee importante tebes, maibe bainhira la hadia infraestrutura ho diak iha Bobonaro nee iha bee manas konserteza turista sei lamai iha nee konfuzaun, tanba nee presiza hadia infraestrutura neebe maka sei aat ,” dehan Armindo.

Entretantu Koordenador partidu FRETILIN Postu Administrativa Munisipiu Bobonaro Sivino Morais hateten, Halibur malu iha nee atu kolia konaba distinu Timor Leste nian, tanba nee ita hamutuk iha eleisaun jeral mai vota ba FRETILIN atu bele fila fali ba kaer ukun hodi liberta povu husi kiak no mukit.

Entretantu Sekertariu Jeral partidu FRETILIN Mari Alktiri ho komutiva to iha fatin dialogu iha tuku 14:00, no simu direita husi Koordenador partidu FRETILIN Postu Administrativa Bobonaro no lia nain sira, depois tara tais ba Sekjer Mari ho komutiva, hafoin nee hakat ba fatin dialogu neebe maka prepara tiha husi komisaun organizadora.

Antes hahu dialogu ho militante sira, hahu uluk ho kanta hino nasional patria patria, kontinua kedan hino partidu foho ramelau, hafoin nee minute de silensia neebe diriji husi Sekjer Partidu FRETILIN Mari no reza. Carme Ximenes

Suara Timor Lorosae
PARTILHAR

Author: verified_user

Publicação luso-timorense sem fins lucrativos

0 comentários: