Lei Komersiál Muda Tanba La Ajusta Ho Realidade

DILI, (TATOLI) — Prezidente Komisaun Reforma Legislativa, Jorge da Graça hateten Kódigu komersiál ne’ebé Timor-Leste (TL) uza tuir Indonézia nian, muda ona tanba la ajusta ho realidade Nasaun nian.

“Ema balun, se sira hakarak negósiu ida ne’ebé ki’ik, bele hahú negósiu ida ne’e. Hanesan responsabilidade ba sira-nia estabelesimentu, sira-nia loja la’ós iha nesesidade atu forma rejista sosiedade ida. Ita tenke haree buat sira ne’e hotu”, esplika Jorge iha Hotel Timor, kinta (22/6).

Nia hatutan, komisaun halo estudu kona-ba kontratu. Bainhira ema ruma halo negósiu sira tenke halo kontratu ho forma lisan ka liuhusi eskrita eh surat ne’ebé iha nia konteúdu tenke deskreve kontratu kompra venda nomós kontratu sira seluk hanesan arendamentu komersiál, importasaun, kontratu ajénsia, ajente no seluk tan.

“Buat sira ne’e tenke iha lei ida ne’ebé haree ba ita-nia realidade nomós haree investidór sira tanba bainhira sira mai iha ita-nia país, sira tenke tuir lei kontratu ne’ebé mak ita fó ba sira”, hatutan.

Kontratu ne’e hetan kondisaun rua. Ida, tuir ita-nia realidade no seluk kondisaun rejionál no internasionál.

Mundu mós iha, regra husi nasaun unida, ASEAN, Uniaun Europeia ne’ebé iha influénsia, sira iha familiaridade.

Ita hakarak sira mai, ita haree mós kondisaun kontratu nian, iha interese sira asina. Lei ida ne’e, ita-nia komisaun halo estudu, fó ba governu, diresaun no prioridade ida ne’ebé governu tenke hetan.

“Agora governu haree programa lei ida hanesan asosiadu ida kona-ba programa reforma ekonómika”, reforsa.

Jorge da Graça informa komisaun, ho kolaborasaun MEKAE (Ministru Estadu Koordenadór Estadu Ekonómiku) hodi haree dook liutan, ne’ebé mak governu ida ne’e presiza aprova dadaun iha sira-nia mandatu.

“Komisaun ida ne’e halo estudu, investigasaun ho profundidade ida ne’ebé bele fó prioridade ba governu iha futuru, haree ba oin, dook oituan”, informa.

Asesór Juniór MEKAE, João Freitas hateten lei ida ne’e, em prínspiu ho intensaun atu atria investimentu husi rai li’ur nomós rai laran hodi hadi’a negósiu iha Timor-Leste.

“Ne’e mak objetivu husi reforma ne’ebé mak ami halo”, informa. Pontu importante husi lei ne’e mak halo ona no planu ba oin mak atu implementa.

“Halo lei fásil, nia implementasaun presiza tempu, presiza instituisaun sira atu implementa lei, halo kapasitasaun ba rekursu umanu”, realsa.

Reforsa : “Ami hein katak governu foun bele kontinua halo implementasaun ba lei sira ne’ebé MEKAE halo ona”, konklui.

Jornalista: Rafy Belo | Editora: Rita Almeida

Foto: Prezidente Komisaun Reforma Legislativa, Jorge da Graça. Foto Tatoli: Rafy Belo