Ilídio Husu Formandu Tibar Aproveita Oportunidade

TIBAR, (TATOLI) – Sekretáriu Estadu Polítika ba Formasaun Profisionál no Empregu (SEPFOPE), Ilídio Ximenes da Costa husu ba formandu 30 ne’ebé tuir treinamentu vokasionál Tibar atu aproveita oportunidade.

“Esforsu ita halo, dezafiu no obstákulu ita hetan maibé naran katak ita labele tuur mehi de’it, oportunidade mak ida ne’e no imi na’in hira orgullu ba imi-nia aan tanba ema barak mak atu mai maibé oportunidade iha teste imi mak di’ak liu no agora tenke hatudu”, hatutan Ilídio iha lansamentu ba treinamentu vokasionál iha Tibar, ohin.

Hatutan tan, kuandu iha vontade atu halo dezenvolvimentu no iha relasaun di’ak (networking) ho ema barak maka dalan sei bele hetan maibé bainhira tuur de’it iha fatin no laiha esperiénsia dalaruma dalan sei lamosu no lalori rezultadu.

Ilídio dehan, kategoria formasaun ba eletrisidade no instrumentasaun klase mundiál ne’ebé sei hetan treinadór husi kompañia Cegeleg husi Fransa katak esforsu Governu halo hamutuk ho kompañia mina no autoridade sira nune’e husu formandu sira atu aproveita.

Nune’e nia husu ba fomandu sira atu labele hatudu arogánsia maibé aprende matenek husi treinadór sira tanba edukadór mak xave ba ema atu forma ema, bainhira laiha mestre, abilidade sei lahetan no laiha serbisu mós sei lahetan.

“Ne’e duni aprende ba malu, mestre aprende husi imi no imi mós bele aprende husi mestre sira, fera imi-nia kakutak saida mak imi atubele fó ba rai ida ne’e nune’e imi tenke aprende ho pasiénsia tanba lahó pasiénsia matenek mós lamai”.

Nia mós agradese ba ConocoPhillips ne’ebé servisu hamutuk ho Autoridade Nasionál Petróleu no Minerál (ANPM) hodi fornese oportunidade ida ne’e ba formandu sira atu aprende iha área indústria nian durante tinan rua iha Sentru Formasaun Tibar ne’ebé ho nia treinador mai husi empreza Cegelec, Fransa.

Ilidio hatutan nia mandatu bele hotu maibé governante foun, programa foun sei kontinua. Nune’e nia hato’o ba formandu no formadór sira katak serbisu no formasaun ne’e importante.

“Ha’u empresta liafuan ida husi matenek na’in ida Brazíl nian Paul Ferreira dehan laiha ema ida hatene buat hotu maibé ema ida hatene buat ida, ne’e hatudu katak presiza kompleta malu no respeita ema nia ideia no ema seluk mós sei respeita imi, ne’ebé labele hatudu imi nia arogánsia maibé kompleta malu, ida ne’e mak importante ba imi nia futuru”.

Jornalista: Maria Auxiliadora | Editora: Rita Almeida

Foto: Sekretáriu Estadu Polítika ba Formasaun Profisionál no Empregu (SEPFOPE), Ilidio Ximenes da Costa.