CNRT Forma Governu Se FRETILIN La Konsege

DILI, (TATOLI) - Partidu Kongresu Nasionál Rekonstruksaun Timor-Leste (CNRT) deside ona iha konfrensia nasionál foin lalais ne’e atu sai de’it opozisaun ba VII governu konstitusional maibé bainhira partidu mais votadu FRETILIN lakonsege forma governu, CNRT sei buka nia aliadu nu’udar segundu mais votadu hodi forma governu tan CNRT tane ás prinsipiu intreses nasionál.

“Ohin, tuku 10H00 otl, iha Ótel Novu Turismu, se lasala, Sekretáriu Jerál FRETILIN, Mari Alkatiri hasoru malu ho estruktura CNRT hodi koalia kona-bá koligasaun ba formasaun VII governu konstitusional,” informa fontes TATOLI foin lalais ne’e.

Iha enkontru ne’e Prezidente Partidu CNRT, Kay Rala Xanana Gusmão sei la partisipa, CNRT sei reprejenta hosi Sekretáriu Jerál, Francisco Kalbuadi Lay ho vice Prezidente sira balun inklui Prezidente CDN, Dionisio Babo.

“Agora hein FRETILIN hakarak koalia ho CNRT ne’e saida, se FRETILIN la konsege forma maioria iha Parlamentu nasionál entaun CNRT hakarak mosu hodi forma governu tan intreses nasionál. Ida ne’e konstituisaun fó dalan,” nia esplika.

Hodi hatutan, negósiasaun saida de’it mak sei koalia ohin enkuantu FRETILIN hakarak duni involve CNRT iha nia governu, CNRT hakarak CNRT mak lidera governu, kargu Primeiru Ministru iha CNRT nia liman, maibé se husu de’it atu CNRT involve iha governasaun CNRT sei mantein dezisaun konfrensia nasionál katak CNRT hakarak Opozisaun.

Iha parte seluk, mensajen Sekretáriu Jerál Partidu FRETILIN, Mari Alkatiri ba estruktura partidu nian katak, FRETILIN hahú dialóg ho partidu hat ne’ebé hetan asentu iha Parlamentu Nasionál (CNRT, PLP, PD no KHUNTO).

“Ida ne’e ezersisiu demókratiku ida inportante ba ita hotu, povu hakarak saida, nia hatudu ona ho nia votu, depende ba lideransa atu komprende,” Alkatiri afirma, hodi husu nafatin timoroan hotu atu kontribui ba paz e estabilidade, keta ansi maibé tempu mak sei halo Justisa.

Partidu CNRT tuir rezultadu eleisaun Parlamentar 2017-2022 hetan asentu iha parlamentu 22 kadeira deputadus, PLP, 8 kadeira deputadus, PD, 7 kadeira Deputadus no KHUNTO, 5 kadeira deputadus.

Antes ne’e mós Prezidente Partidu CNRT, Kay Rala Xanana Gusmão iha nia diskursu ba abertura konfrensia foin lalais ne’e hatete, povu haree iha tinan sanulu nia laran CNRT la iha kbiit atu ukun.

“Ohin ha’u konvida ita boot sira hotu atu hasai rezolusaun ida dehan katak, tanba CNRT lakon iha eleisaun ida ne’e, partidu CNRT hakarak fiel ba nia liafuan katak la manan maioria hela ba opozisaun, hodi afirma konsistensia polítika,” Xanana konvida konfresista sira nune’e ikus mai hamosu rezolusaun tolu hosi rezultadu konfrensia ne’e.

Rezolusaun tolu ne’e mak hanesan, CNRT diside sai opozisaun, ne’ebé sei kumpri nia dever tuir konstituisaun haruk ne’ebé sei fó kontribuisaun tomak ne’ebé posetiva no konstruktiva hodi tane ás intreses nasionál hodi servi di’ak liu nasaun doben ida ne’e.

Rezolusaun seluk-seluk tan mak suspende demisaun Prezidente Kay Rala Xanana Gusmão hosi kargu Prezidente Partidu no auditoria internal Partidu nian.

Haktuir iha kápitulu II Formasaun no Responsabilidade, artigo 106 (Nomeasaun) pontu 1) Primeiru-Ministru hili hosi partidu ida ne’ebé iha votu barak liu ka hosi aliansa partidu sira-ne’ebé iha nia ema barak iha Parlamentu no iha nomeasaun hosi Prezidente Repúblika, bainhira rona tiha partidu polítiku sira ne’ebé iha reprejentante sira iha Parlamentu Nasionál, 2) Membru Governu sira seluk, Prezidente Repúblika mak sei hili liuhosi xefi-ministru nia proposta.

Manuel Pinto | TATOLI      

Foto: Sekretáriu Jerál FRETILIN, Mari Alkatiri dada lia ho Prezidente CNRT, Kay Rala Xanana Gusmão.