Parlamentu Nasional Deside Tokon $2.79 Sosa Prado Foun

DILI: Reuniaun lider bankada parlamentár ne’ebé envolve partidu FRETILIN, CNRT, PD no Frente Mudansa deside ona hodi sosa tan karreta foun 65 ba deputadu foun sira ne’ebé atu ba tuur iha Uma Fukun.

Tuir planu, Konsellu Administrasaun Parlamentu Nasionál ne’ebé kompostu husi bankada haat ne’e prezerva ona osan ho presu US$ 34.000 kada Prado unidade ida. Ne’e duni, husi totál karreta 65 ne’ebé atu sosa Parlamentu Nasionál tenke hasai osan hamutuk tokon $2.79.

“Ami deside hodi hola tan karreta foun ba deputadu foun sira”, dehan membru Komisaun Administrasaun PN, Deputada Brígida Correia, iha Uma Fukun PN, horisehik.

Nune’e, ba karreta hirak ne’ebé agora daudaun deputadu sira uza sei leilaun, tanba pareser husi istolójiku sira katak karreta sira ne’e barak laiha ona kondisaun atu bele kontinua utiliza ba servisu deputadu foun. Nune’e, kustu ba manutensaun mós boot.

“Prosesu sosa karreta foun agora daudaun iha ona Komisaun Nasionál Aprovizionamentu (CNA) nia fatin oinsá atu loke konkursu públiku hodi bele sosa ka hatama karreta foun”, dehan Brígida.

Nia hatutan, iha períodu tinan 2012 karreta Prado nia folin rihun $63, iha períodu ida ne’e ninia kustu hatún fali ba rihun $43. Karreta ne’e ninia marka hanesan, maibé espesifikasaun mak diferente.

Espesifikasaun karreta nian diferente tanba haree fila-fali ba dezenvolvimentu estrada iha Timor hahú di'ak ona. Ne’e duni, sosa karreta mós tuir kondisaun dalan iha rai laran.

Alende ne’e, negosiasaun ne'ebé parte Konsellu Administrasaun PN halo ho CNA, tuir planu iha loron 120 nia laran sei to’o iha Timor hodi entrega ba membru deputadu foun sira ne'ebé atu mai.

Jacinto Xavier | Independente