Eis-Prezidente Ramos-Horta fila fali ba Governu timoroan hodi apoia konsolidasaun nasaun nian

Eis-Prezidente timoroan, José Ramos-Horta, hatete katak iha loron-sesta ne'e fila fali ba Ezekutivu hodi apoia esforsu sira governasaun Mari Alkatiri nian no kontribui hod hametin dame no dezenvolvimentu Timor-Leste nian iha tinan hirak tuirmai.

"Tinan haat ka lima tuirmai hanesan importante hodi hametin dame no ba konstrusaun nasaun nian no ba entrega ba jerasaun fpun no tanba ne'e maka ha'u hanoin hanesan obrigasaun aseita konviti hosi Mari Alkatiri hodi halo parte iha nia ekipa", Ramos-Horta hatete ba Lusa.

"Ha'u hamutuk ho nia dezde tinan 1975 no hanesan ami nia obrigasa polítika no moral, jerasaun hosi 75, apoia Mari Alkatiri", nia hatutan.

Antigu Prezidente Timor-Leste nian, Ramos-Horta sei halo parte iha Ezekutivu nu'udar ministru Estadu no konselleiru ba Seguransa Nasional, fila fali ba kargu ezekutivu ida, hafoin sai ona nu'udar xefe diplomasia iha Governu dahuluk timoroan nian (2002) no asumi knaar nu'udar primeiru-ministru entre tinan 2006 no 2007.

Governu koligasaun, lidera hosi Mari Alkatiri, hetan apoiu hosi Frente Revolucionária do Timor-Leste Independente (Fretilin) no hosi Partidu Demokrátiku (PD), konta ho membru independente sira ka hosi forsa polítika sira seluk.

Ramos-Horta esplika ona katak sei halo parte iha Governu iha mekanizmu foun ida, Konsellu Seguransa Nasional nian, modelu hanesan ho norte-amerikanu, ne'ebé "halo parte hosi gabinete primeiru-ministru nian".

"Ha'u sei sai nu'udar primeiru-ministru nia konselleiru iha área sira hanesna polítika esternu, defeza ho seguransa. Maibé ha'u haree katak ha'u nia knaar liuliu maka apoia ministru sira iha dinamizasaun, reforma sira no hadi'a asaun sira ne'ebé maka presiza", nia afirma.

Maski hahú hanesan governu minoritáriu ida, Ramos-Horta hatudu fiar katak "sei hanesan Governu forte ida" no katak Xanana Gusmão, líder hosi Congresso Nacional da Reconstrução Timorense (CNRT), partidu daruak ne'ebé hetan liu votu, sei fó nia apoiu.

"Xanana Gusmão sei hamutuk ho ami hodi viabiliza Governu, tanba ami kontinua saida maka halo tiha ona iha tinan hirak ne'e nia laran. Instabilidade labele hamosu risku ba esforsu tomak ne'ebé maka nia ho nia Governu halo ona iha tinan sanulu ikus ne'e", nia hatete.

Iha loron-sábadu, José Ramos-Horte sei ba Nova Iorke, sei aprezenta xefe Estadu, Francisco Guterres Lu-Olo, iha sesaun ba dala 72 hosi Asembleia-Jeral ONU nian no sei halo diskursu hodi Timor-Leste nia naran iha loron 20 Setembru.

Antigu prezidente timoroan sei partisipa mós iha sesaun espesial ida hosi Konsellu Seguransa nian kona-ba operasaun sira dame ONU nian no sei iha relatóriu hosi painel ba operasaun sira dame nian ne'ebé Horta rasik prezidi ona.

Ramos-Horta sei mantén enkontru sira relasionadu ho grupu G7+ ho reuniaun sira seluk ne'ebé tama ona iha ajenda xefe Estadu nian, hanesan debate ruma kona-ba prosesu negosial entre Timor-Leste ho Austrália kona-ba fronteira tasi nian.

"Hanesan ba dala uluk maka mekanizmu ONU nian uza ona hodi rezolve konflitu ida hanesan ne'e no iha ema barak maka iha interese ba asuntu ne'e", nia esplika ona.

Francisco Guterres Lu-Olo labele partisipa iha viajen, tanba momentu atual ne'ebé maka Timor-Leste hasoru hela, tanba hala'o hela tranzisaun governativu ida.

SAPO TL ho Lusa