Prezidente Repúblika Fiar Sétimu Governu Sei Dura

DILI, (TATOLI) – Prezidente Repúblika, Francisco Guterres Lú Olo fiar katak Governu Konstitusionál da-hituk ne’ebé sei toma pose sei dura to’o tinan lima.

“Ha’u fiar ho laran tomak katak VII Governu ne’ebé hahú ohin hala’o kna’ar sei metin no sei hala’o sira-nia kna’ar tinan lima tuir mai”, Lú Olo deklara liuhosi ninia diskursu iha abertura lejislatura da-haat iha Parlamentu Nasionál, ohin.

“Tambasá ha’u fiar, tanba ha’u fiar katak señor deputadu no señora deputada sira sei kaer metin Ita-Boot sira-nia responsabilidade nu’udar reprezentante Ita-nia povu doben nian. Povu ne’e hakarak moris ho páz no estabilidade. Kondisaun ida ne’e importante tebes atu ita bele hala’o dezenvolvimentu no halakon ki’ak”.

Haree ba  rezultadu eleisaun, nia informa, Prezidente Repúblika konvida partidu vensedór FRETILIN atu ko’alia ho partidu ne’ebé hetan assentu iha Parlamentu Nasionál hodi forma VII Governu. Tan ne’e, iha 13 setembru, nia simu akordu koligasaun hosi FRETILIN, PD no nomeia ona Mari Alkatiri nu’udar Primeiru Ministru.

“Timor-Leste nunka hasoru krize institusionál no sei la hasoru tanba ita hotu iha maturidade polítika, ita hotu iha sentidu Estadu, Ita hotu sei respeita vontade povu nian liuhosi eleisaun demokrátika”, afirma.

Parlamentu Nasionál maka órgaun estadu ho responsabilidade boot liu atu kaer metin estabilidade polítika no governativa ba VII Governu durante tinan lima tuir mai, estabilidade ne’e depende hosi votu konfiansa.

Oportunidade ne’e, Lú Olo tenik, laiha órgaun soberania ida importante liu ida seluk tanba ida-idak iha nia kbiit rasik.

Tuir Konstituisaun Timor-Leste, nia dehan, órgaun soberania  ida-idak hala’o ninia kna’ar rasik ho independénsia. Konstituisaun garante mós katak órgaun haat hanesan Prezidente, Parlamentu, Governu no Tribunál iha relasaun ba malu ho nível dependénsia oin-oin, hosi kna’ar ne’ebé sira hala’o.

“Ita-nia Estadu iha karáter demokrátiku! Parlamentu Nasionál maka garante demokrasia iha ita-nia rain. Oinsá Parlamentu garante demokrasia iha ita-nia rain, liuhosi lei sira ne’ebé espresa duni vontade jerál povu nian tanba demokrasia. Signifika, rejime polítiku ida ne’ebé tau a’as povu nia interese no hakarak. Parlamentu interpreta povu nia hakarak no aprova projetu lei ka proposta lei sira ne’ebé Parlamentu rasik maka halo ka Governu maka prepara. Prezidente Repúblika promulga no bainhira Jornál Repúblika públika ona, estadu tomak no sidadaun ida-idak tenke respeita”, Lú Olo haklaken.

Hatutan, konstituisaun temi Estadu Direitu Demokrátiku, entaun kuadru jurídiku tenke reflete duni sentimentu sidadaun sira-nian, sidadaun sira-nia hakarak atu hadi’a sira-nia moris.

“Lei sira ne’e tenke tanen mós justisa sosiál katak sei serve ba sidadaun hotu-hotu, la haree ba ema riku ka kiak, feto ka mane, klosan ka ferik ka katuas, hosi relijiaun katólika ka seluk, rasa ka etnia ka distritu  ne’ebé de’it. Nune’e, Ita-Boot sira sei sai lalenok ba povu tomak no ba ita-nia nasaun”, hatutan.

Jornalista: Xisto Freitas | Editora: Rita Almeida

Foto: Prezidente Repúblika, Francisco Guterres Lú Olo halo diskursu iha abertura lejislatura da-haat Parlamentu Nasionál, ohin. Foto António Goncalves