sábado, 16 de setembro de 2017

Lu-Olo husu transparénsia no respeitu iha debate parlamentu nian

Iha loron-sesta ne'e, Prezidente timoroan husu ona debate parlamentu sira nian ho "transparénsia, amizade loloos, respeitu no responsabilidade" no atu, hamutuk ho órgaun sira seluk Estadu nian, ajuda hadi'a kondisaun moris hosi populasaun nian.

"Povu defende debate, maibé debate ida ne'ebé iha amizade loloos no transparénsia. Hakarak rona hanoin sira ne'ebé loke dalan ba buat foun ne'ebé bele halo di'ak. Hakarak haree hahalok ida ne'ebé hatudu kultura ida toleránsia nian, respeitu, solidariedade, espíritu ekipa nian no sentidu responsabilidade hodi kaer knaar sira", Francisco Guterres Lu-Olo hatete.

Prezidente timoroan ko'alia bainhira hahú sesaun solene ne'ebé marka mós inísiu hosi sesaun lejislativu dahuluk hosi lejislatura daneen hosi Parlamentu Nasional, ne'ebé deputadu na'in 65, eleitu iha lejislativu loron 22 Jullu liubá, simu ona pose iha fulan ne'e.

"Povu hein katak apoia no serbisu hamutuk ho órgaun sira Estadu nian hodi hadi'a kondisaun sira moris nian. Ha'u fiar katak imi sei asumi knaar nu'udar povu nia matadalan iha tinan lima oinmai. Bainhira la'o hosi dalan ne'e, imi sei hetan povu nia fiar nune'e mós sei hetan nafatin nia apoiu", Lu-Olo hatete iha nia diskursu dahuluk iha Parlamentu Nasional timoroan nian.


Sesaun iha Parlamentu hahú ho intervensaun badak sira hosi bankada lima: Frente Revolucionária do Timor-Leste Independente (Fretilin), deputadu na'in 23, Congresso Nacional da Reconstrução Timorense (CNRT), deputadu na'in 22, Partidu Libertasaun Popular (PLP), deputadu na'in ualu, Partidu Demokrátiku (PD), deputadu na'in hitu, ho Kmanek Haburas Unidade Nacional Timor Oan (KHUNTO), deputadu na'in lima.

Lu-Olo felisita ona deputadu na'in 65 no prezidente Parlamentu Nasional, Aniceto Guterres, jurista ida ne'ebé "la pertense de'it ba jerasaun foun maibé loos ba jerasaun ida ne'ebé promove vontade koletivu afirmasaun nian nu'udar povu no mós nasaun".

"Bainhira simu mandatu ne'e, imi hetan mós tusan ida, hodi simu responsabilidade boot ida", nia hatete ba deputadu sira.

Lu-Olo destaka ona partisipasaun hosi feto sira iha Parlamentu no refere ona ba diversidade ne'ebé hatudu iha bankada parlamentu nian, ho jerasaun sira ne'ebé la hanesan, deputadu sira ho esperiénsia barak no balun ladún iha esperiénsia iha parlamentu no polítika no esperiénsia iha funsaun públiku no privadu sira.

Nia husu ba sira hotu empeñu maka'as hodi hametin kuadru jurídiku no lejislativu ne'ebé adekuadu ba realidade timoroan nian.

"Ita presiza lei sira hodi regula, hametin no dezenvolve ita nia nasaun. Sidadaun sira tenki iha dever hodi kumpri lei sira. Tanba ne'e sira presiza hatene finalidade hosi lei sira ne'e", nia hatete.

"Hodi garanti komprensaun di'ak ida, hanesan imperativu atu lei sira iha linguajen simples no adekuadu. Permiti ha'u hodi hatete: kumprimentu hosi lei sira eziji redasaun hosi lei sira rasik tuir realidade timoroan nian no ho dalan ne'ebé permiti komprensaun ne'ebé fásil", nia hatete.

Iha diskursu, xefe Estadu timoroan fó hanoin progresu sira ne'ebé hetan ona iha Timor-Leste hahú hosi restaurasaun independénsia iha tinan 2002, ho progresivu hodi hametin instituisaun sira no órgaun sira soberania nian.

Hanesan ezemplu, Lo-Olo hanoin hikas katak eleisaun prezidensial no lejislativu sira iha tinan ne'e hala'o rasik hosi ema timoroan sira no akontese ho dalan livre no transparente.

Xefe Estadu insisti ona iha nesesidade hodi hametin kuadru jurídiku no lejislativu, hodi buka sai hanesan reflexu ida "hosi sidadaun sira nia sentimentu no vontade hodi hadi'a sira nia kondisaun moris nian".

Labele haree ba bankada ne'ebé imi okupa, deputadu sira tenki kontribui "hodi kria ambiente ida ne'ebé hatudu preokupasaun hosi órgaun ne'e ba povu timoroan nian moris no vontade", nia destaka.

Lu-Olo konsidera katak hanesan importante defende no hametin nafatin Estadu Direitu iha Timor-Leste, konsolida ambiente dame no estabilidade iha tinan hirak ikus ne'e, hanesan "kondisaun fundamental ba dezenvolvimentu nasaun nian no hodi halakon pobreza".

"Ha'u mai hosi família simples ida. Durante tinan 24 nia laran ha'u moris no luta ona hamutuk ho povu sira iha ai-laran. Iha ne'ebá maka ha'u aprende hadomi no respeita liután ita nia povu. Ha'u sai ona hanesan sasin hosi nia korajen, hosi nia sakrifísiu no nia determinasaun hodi mantén espíritu Independénsia nian", nia hatete.

"Iha tinan barak nia laran ha'u mós rona aman-inan no oan sira nia halerik iha ai-laran. Ohin loron ita sai independente, maibé ita nia povu halerik nafatin. Pobreza kontinua nafatin iha ita nia povu. Ita nia povu terus kleur ona. Ita nia povu tenki hetan ona moris di'ak ida", nia hatutan mós.

SAPO TL ho Lusa

Sem comentários: