Governu timoroan hakarak hametin investimentu iha área sosial sira

Programa hosi Governu konstitusional dahitu timoroan nia prioridade sira maka área sosial hodi hametin oferta no kualidade hosi serbisu edukativu sira no saúde, promove indústria kriativu ho kultural nasional nian no apoia ema sira ne'ebé fraku.

Testu, ne'ebé entrega iha loron-tersa ne'e iha Parlamentu Nasional no ne'ebé maka Lusa hetan asesu, defini konjuntu ida hosi medida transversál sira ba área edukativu ho saúde, nune'e mós apoiu ba veteranu sira kombate nian hasoru okupasaun indonéziu, apoiu ba ekonomia "sosial ho solidáriu" no konsolidasaun ba Estratéjia Nasional hosi Protesaun Sosial nian.

Entre medida sira seluk, Governu anunsia Programa Nasional foun ida hosi Apoiu ba Ekonomia Sosial no Solidáriu, kompromete kombate prekaridade serbisu nian no avansa ho Estratéjia Nasional foun ida ba Empregu 2017-2030 ne'ebé iha baze iha aumentu hodi buka serbisu, hadi'a oferta no fortalese instituisaun sira hosi merkadu serbisu nian.

Ba área edukativu, programa iha baze iha reforsu infraestrutura sira no rekursu ema nian dezde nível pré-eskolar to'o ensinu superior, tékniku no ensinu rekorente.

Governu hatete iha dokumentu kriasaun hosi Institutu Politékniku ida Hotelaria ho Turizmu nian, iha Lospalos, iha ponta leste nasaun nian no Akademia ida Peska no Estudu Mariñu sira nian iha Manatuto, iha leste Díli nian, nune'e mós reforsu hosi Institutu Politékniku Betano nian.

Hakarak mós aumenta oferta bolsa sira estudu nian no kontinua nafatin ba Sentru Aprendizajen ho Formasaun Eskolar (CAFE), projetu ne'ebé konta ho apoiu hosi Portugal ne'ebé iha Timor-Leste iha dosente na'in 130 resin ne'ebé namkari iha munisípiu tomak.

Avalia mapeamentu eskola nian, harii dormitóriu sira ba alunu sira ne'ebé maka hela dook hosi eskola no kria programa ida hosi Transporte Eskola nian iha "zona prioritáriu sira" hanesan medida sira seluk.

Iha nível global, Governu hakarak hadi'a kualidade ensinu nian, igualdade asesu no hamenus insusesu eskolar, hahú sedu hodi buka reforsa infraestrutura sira no rekursu ema nian iha pré-eskolar.

Iha nível báziku, objetivu maka kualidade ensinu nian, ho aposta iha domíniu lian ofisial sira, matemátika, informátika, siénsia sosial sira no sidadania nian, no sira seluk, avansa iha inisiativu hosi "Eskola iha tempu tomak" no iha rekualifikasaun hosi profesor sira.

Governu rekoñese nesesidade hodi hadi'a ensinu, iha nível jeral, tékniku-profisional sekundáriu, ho aumentu no diversifikasaun hosi oferta, reforsu iha infraestrutura sira no formasaun nafatin ba profesor sira.

Ezekutivu hakarak mós kontinua programa sira alfabetizasaun, hametin formasaun hosi ema adultu sira no sei harii Sentru Komunitáriu sira ba Aprendizajen nian iha munisípiu tomak nasaun nian.

Falta kualidade ensinu nain no serbisu ba ema sira ne'ebé graduadu ba Governu hanesan dezafiu boot sira hosi ensinu superior.

Kona-ba Kultura, Governu hakarak harii biblioteka ida no muzeu nasional, Akademia Arte no Indústria Kriativu Kultural sira, Institutu ida hosi Patrimóniu Kultural nian no Sentru Kultural munisipal sira.

Ezekutivu hakarak hametin mós Serbisu Nasional Saúde nian, liuliu kapasidade téknika hosi hospital sira, fó liu ba sira "autonomia ho responsabilizasaun hosi jestaun integradu".

Kombate hasoru moras kardiovaskular sira, diabetes ho moras kankru sira no kombate hasoru konsumu álkol nian no tabako halo parte mós iha prioridade sira, nune'e mós oinsa hadi'a sistema sira informasaun nian iha área ho favorese parseria públiku-privadu.

Iha nível laboral, Governu hakarak aumenta parseria sira - nune'e mós ho parseria sira ne'ebé ezisti ona ho Austrália ho Koreia-Súl - hodi nune'e ema timoroan sira bele serbisu iha estranjeiru, no sei aprova no fortalese Estratéjia Nasional ba Protesaun Sosial nian.

Promosaun ba igualdade jéneru, kombate hasoru violénsia jéneru nian no medida sira hodi hadi'a asesu feto sira nian no joven sira ba ekonomia hanesan mós medida sira seluk.

SAPO TL ho Lusa