Governu Laiha Politika Diak, Negosiante Ambulante Kontinua

DILI - Maske governu kria ona lei Numeiro 33/2008 hodi bandu negosiante sira labele uza fatin publiku hodi atividade negosiu, maibe realidade hatudu negosiante balun kontinua uza fatin publiku tantu trotoar hodi halo aktividade negosiu, buat hirak nee mosu tamba governu la iha politika diak hodi regula negosiante ambulantes.

Tuir Xefe Suku Comoro Eurico da Costa hatete ba maluk negosiante ambulantes neebe oras nee dadaun balun sei faan iha dalan ninin no balun kontinua faan iha trotoar leten ne tamba failansu mosu iha jestaun merkadu.

“Ita nian maluk sira nebe maka kontinua halo aktividade negosiau iha fatin arbiru iha suku Comoro tanto iha fatin seluk iha sidade laran nee tamba fansu nee husi gestaun merkadu neebe maka governu monta ladun dia ho ida nee maka too ohin loron negosiante kontinua faan arbiru iha fatin fatin iha sidade Dili,” dehan Eurico ba STL iha nia knar fatin sede Suku Comoro, Sesta (1/12/2017).

Nia dehan governu kria ona sentru merkadu rua iha capital Dili hanesan Merkadu Manleuan no Merkadu Taibesi, tuir lolos governu halo politika diak liu-liu ba jestaun merkadu, hodi nunee bele regula negosiante sira bele halo aktividade tuir fatin negosiu nia laos hanesan agora fatin neebe maka governu bandu sira halo aktividade negosiu hanesan iha trotoar no fatin seluk.

Iha sorin seluk Deputadu Domingos Carbalho hateten maske governu estabelese ona sentru merkadu maibe negosiante kontinua halo aktividae ngosiu latuir fatin. 

Natalino Costa | Suara Timor Lorosae