PARABENS STL! Aniversariu tinan ba dala rua nulu resin lima

Adriano: Ho Idade 25 STL Bele Maduru Liu Tan

DILI - Iha di un Fevereiru agora, media STL CORP halo tinan ba dala rua nulu resin lima, tanba nee ho idade nee STL bele sai maduru liu tan.

Ministru PCM Adriano do Nascimento hateten, STL nia aniversariu ho tinan idade ida hanesan nee hein katak STL maduru liu tan, tanba STL jornal ida neebe ke desde tempu Indonezia troka naran deit, mais ema neebe kaer STL hanesan deit.

Hau fiar katak STL aprende misaun lubun ida husi buat ida neebe ke laiha to moris to agora, I agora halo 25 anus neebe bele ona haketak buat neebe ke diak ba intituisaun, no mos buat neebe maka aat ba intituisaun, hau fiar katak STL ho idade ida nee bele hatudu profesionalismu iha prosesu kobertura ba informasaun, I depois desemina informasaun hau hanoin ida nee maka importante tebes,” dehan Ministru PCM Adriano, ba STL, iha nia servisu fatin, Palasiu Governu, Dili, Segunda (15/01/2018).

Ministru PCM Adriano mos fiar STL sei halo nia knar neebe diak liu tan, tanba ho tinan ida 25 anus laos tan deit iha idade, maibe iha mos kualidade kualidade 25 anus ninian, tanba nee maske STL infernta situasaun neebe ke defisil, mais importante maka espiritu no esperansa.

Ministru PCM Adriano husu STL atu fo kontribuisaun liu husi produsaun notisias ba prosesu dezenvolvimentu, tanba nasaun Timor Leste iha prosesu rekontruksaun Estadu, tanba nee maka media liu liu STL ho ninia idade 25 anus nee, para kontribui involve aan iha prosesu rekostruksaun Estadu. 

Carme Ximenes/Maria Lay | Suara Timor Lorosae

Fidelis: Kongratula- Apresia Servisu STL

DILI – Kongratula no apresia ba media Suara Timor Lorosae (STL), neebe atu halo aniversariu iha dia 1 de Fevereiru ba dala 25.

Xefe Bankada PLP Fidelis Magalhaes hatoo parabens ba STL, tanba husi tempu naruk nia laran hahu husi STT (Suara Timor-Timor) mai too Timor ukun aan nakfila aan ba STL.

“Timor ukun aan STT nakfila aan ba STL, buat neebe mak ami apresia husi STL, tanba kontribui ba pluralizmu politiku iha Timor-Leste nee importante tebes, tanba nasaun atu ba oin tenke fo sai lian oin-oin husi ita nia sosiedade,” katak Fidelis ba STL Kinta foin Lalais nee iha Parlamentu Nasional (PN).

Fidelis hatete, nia rasik iha kliping barak iha uluk STT nia tempu, iha momentu neeba tempu neebe difisil ba Timor oan hotu, maibe STT buka dalan hodi halo mensajen diak ba Timor-Leste tomak, ho nia nuansa no maneira oin-oin.

Espera mos jornalista sira sei aumenta tan profisionalizmu iha STL, husu mos ba nain STL atu tau matan ba kondisaun funsionariu sira no jornalista sira, tanba jornalista nia kondisaun saudavel, ba sira nia moris no familia, mak sira halo servisu ho produtividade aas. 

Guilhermina Franco | Suara Timor Lorosae