AIFAESA Halo Inspesaun Bazea Ba Keixa Husi Konsumidór

DILI, (TATOLI) – Autoridade Inspesaun no Fiskalizasaun ba Atividade Ekonómika no Sanitária (AIFAESA) nia atividade inspesaun rutina ba produtu komersiál sira  daudaun ne’e seidauk bele la’o hanesan baibain tanba problema iha meiu ne’ebé atu suporta atividade, tanba ne’e AIFAESA daudaun foku liu de’it ba keixa ka reklamasaun husi konsumidór sira.

Xefe Divizaun Operasaun, AIFAESA, Alfonsius Costa Acoyt, hatete dezde iha abríl nia klaran ne’e instituisaun ne’e hasoru problema liuliu transporte atu apoiu serbisu operasionál nian nomós utilizasaun rejime duodésimu ne’ebé difikulta atubele halo serbisu normál.

“Transporte sira ne’ebé uza ne’e barak liu antigu entaun difisil tebes atu halo manutensaun ho períodu ida lalais, tanba ne’e mak ami uza de’it transporte hira oan ne’ebé la’ós ba operasionál nian hodi halo inspesaun liuliu ba keixa ka reklamasaun ne’ebé hato’o. Aleinde ne’e halo de’it serbisu verifikasaun ba restaurante sira ne’ebé hadi’a ona sira-nia fatin”, katak Alfonsius iha Matadoru, ohin.

Sobre keixa ne’ebé hato’o husi kompradór sira no AIFAESA atende hela mak produtu hanesan roti tawar, marmelada no tik-tak tanba deskonfia labarik konsome no halo sira kabun moras, nune’e AIFAESA halo atuasaun no apreensaun ba produtu balun no nia kontinuasaun sei hein konfirmasaun husi médiku ne’ebé fó konsulta ba vítima ne’e atu hatene nia rezultadu hafoin iha posibilidade halo teste ba produtu ne’ebé provoka moras.

“Ami-nia inspesaun rutina sei reativa depois de eleisaun. Ami diskute dala hira ona rejime dotasaun orsamentu temporária ne’e difisil lahalimar atu aplika buat sira ne’ebé uluk fasil para ita atu hala’o”.

Nune’e utilizasaun duodésimu susar atu halo serbisu hanesan normál no knaar inspesaun sira ne’ebé iha munisípiu labele halo maski iha ona planu.

“Mas kestaun emerjénsia sira ne’e ami tenta másimu posivel para atende ema nia reklamasaun sira ne’e”.

Aleinde haree de’it ba prioridade ne’ebé tenke halo, AIFAESA mós halo ona destruisaun ba produtu ne’ebé apreende dezde juñu to’o dezembru tinan kotuk ne’ebé nia prosesu ne’e remata ona mak ida ne’ebé kategoria liu prazu hanesan snack iha unidade 398, hemun alkólika 29, la’ós alkólika 994, aditivu alimentár 464 no tabaku eletróniku ho nia líkidu unidade 105.

“Janeiru to’o fevereiru 2018 nian iha tipu snack iha 1475, bebida la’ós alkólika ne’e 361 no temperus sira ne’e iha unidade 45”.

Jornalista: Maria Auxiliadora | Editora: Rita Almeida