segunda-feira, 14 de maio de 2018

Komemora 20 Maiu, Ema Hotu Hasa’e Bandeira Iha Uma Oin

PARTILHAR

DILI, (TATOLI) – Silveiro Lopes Pereira, joven ida ne’ebe hala’o atividade fa’an bandeira iha área Palásiu Governu hakarak ema hotu hasa’e bandeira Timor-Leste iha uma oin tanba 20 maiu ne’e loron espesiál ba timoroan.

“Hanesan 20 Maiu ne’e motór no karreta tenke uza bandeira no iha uma oin sira ne’e bandeira tenke hasa’e, tanba ne’e loron importante ba ita timoroan”, katak nia bainhira dada lia ho Tatoli, ohin iha Palásiu Governu nia oin.

Joven ne’e hatutan atividade fa’an bandeira ne’e hala’o de’it iha loron restaurasaun independésia Timor-Leste nian ne’ebé monu iha 20 maiu, maibé iha 28 novembru ne’e lahalo atividade.

Hanesan klosan ne’ebé hakarak kontinua nia estudu iha universidade ne’ebé daudaun tuir hela kursu ne’e hatete liuhusi fa’an bandeira ida ne’e bele hetan netik osan atu selu nia kursu.

“Loron ida sorte di’ak ami bele hetan dólar 15 to’o 20”, dehan nia.

Alito Martins, estudante ida ho tinan 10 ne’ebé halo atividade hanesan hatete hakarak buka moris rasik hodi ajuda inan-aman.

“Tuku ualu dadeer bá eskola no sai iha meiudia depois han mak mai fa’an no fila uma tuku neen ka hitu”.

Ebio Benevides da Silva, alunu ho idade 11 ne’e mós hamutuk ho nia kolega sira fa’an bandeira bainhira sai husi eskola.

 “Estuda iha kalan, loron kuandu sai eskola ami fa’an, maibé tempu ida ema sosa no dalaruma lasosa”.

Hanesan vendedór ne’ebé hatene tempu hodi fa’an símbolu nasionál ne’e iha estrada ibun tanba iha loron importante ida ne’e ema barak mak hakarak sosa no tau iha motór no karreta oin hodi festeza loron independénsia ne’ebé Timor-Leste atu komemora iha tempu besik ne’e.

Jornalista: Maria Auxiliadora | Editora: Rita Almeida

Imajen: Joventude ida tur hein hela Bandeira Nasional no bandeirola Timor Leste nian neebe faan iha area estrada ibun kampung Alor Dili, 15 Maiu 2017. Aktividades joven no labarik sira faan Bandeira no bandeirola nee akontese wainhira ita atu komemora loron Nasional Timor Leste nian. Foto TATOLI
PARTILHAR

Author: verified_user

Publicação luso-timorense sem fins lucrativos

0 comentários: