segunda-feira, 14 de maio de 2018

Parabéns ba Kampeaun Tasa Hassanal Bolkiah

PARTILHAR

DILI, (TATOLI) – Primeiru-Ministru, Marí Alkatiri, ohin simu ekipa futeból sub 21 ne’ebé sai kampeaun ba tasa Hassanal Bolkiah, iha Bruneu Darusalam.

“Ba dala uluk ha’u hato’o parabéns ba ekipa tomak no ba Timor-Leste, tanba pela primeira vez ita manán primeiru lugar, ne’e importante tebes. Ha’u hakarak mós hatete katak ha’u haree ita nia jogadór sira fizikamente preparadu atu bele kontinua iha sub-21”, dehan Xefe Governu iha aeroportu internasionál Nicolau Lobato, Komoro.

Akompaña hosi Sekretáriu Estadu Desportu no Promosaun Alta Kompetisaun, Osório Florindo da Conceição Costa, Xefe Ezekutivu simu jogadór sira, treinadór no korpu diretiva ne’ebé akompaña durante jogu iha Brunei Darusalam ho tara tais.

Xefi Governu mós fó ezemplu, jogadór koñesidu Cristiano Ronaldo ho Messi hodi fó korajen katak maske jogadór sira ne’e tinan boot liu ona maibé tanba sira treinu bebeik nune’e to’o agora sira sei forti nafatin.

“Ha’u hakarak fó korajen no ánimu ba ha’u nia oan sira atu lalika deziste, maibé imi presiza hakuak atividade ida ne’e tanba imi bele reprezenta di’ak ona Timor-Leste tomak iha Brunei Darusalam atu halo eforsu para bele kontinua nafatin di’ak liután ba ita nia Nasaun”, deseju.

Hodi hatutan: “Ha’u atu dehan katak nasaun tomak kontente ho vitória ne’ebé Timor-Leste hetan no bainhira ha’u haree iha internet imi joga ho dinámiku tebes no manán ho direitu rasik ho méritu rasik”. (KI GPM)

Imajen: Kampeanatu tasa Hassanal Bolkiah, bainhira fila hikas mai Timor, ohin. Foto GPM
PARTILHAR

Author: verified_user

Publicação luso-timorense sem fins lucrativos

0 comentários: