PD fó Parabéns Ba AMP

DILI, (TATOLI) – Nu’udar partidu ne’ebé konkore iha Eleisaun Antesipada, Partidu Demokrátiku (PD) fó parabéns ba koligasaun Aliansa Mudansa ba Progressu (AMP) nu’udar vensedór ho votu maioria no kompromete sei defende nafatin programa ba povu nia moris di’ak iha uma fukun.

“Partidu Demokrátiku simu rezultadu eleisaun no fó parabéns ba AMP ne’ebé mak manan, tanba ukun ba rai no povu ida ne’e kontinua la’o ba oin, ami sempre fó apoiu ba povu no rai ne’e nia di’ak”, tenik Prezidente PD, Mariano Assanami Sabino iha konferénsia imprensa ne’ebé hala’o iha sede Kolmera, ohin.

Kona-ba kadeira ne’ebé mak menus iha Parlamentu Nasionál (PN) tuir nia la merese tanba kuadru tomak halo esforsu maibé dever partidu  kontinuadór ne’e mak kontribui ba valór demokrasia.

“Ne’e vontade povu nian mak ne’e duni maibé nu’udar partidu jerasaun kontinuadór sempre iha responsabilidade boot tebes hodi haburas demokrasia no konstrui rai ida ne’e ho valores demokrasia nu’udar lisan ba ukun no moris. Ho servisu militante no kuadru ne’ebé mak ami iha, ami la merese atu hetan kadeira lima”, dehan.

Assnami akresenta lia-fuan “Ba Timor Ami Maubere Oan Prontu Atu Serbí”, ne’e la signifika tenke tama iha governu, tanba ne’e nu’udar lider partidu jerasaun foun nia apela ba militante no kuadru hotu atu serbí nafatin hodi profissaun saida de’it.

“Atu sai saida de’it, imi militante PD ne’ebé ba timor ita serbí nafatin, kontinua iha ida-idak nia fatin no servisu nafatin ho laran ba profissaun saida de’it tenke servisu ba rai ne’e”, katak.

Pozisaun iha PN, nia afirma PD iha ona esperiénsia sai opozisaun ne’ebé konstrutivu no edukativu, tanba ne’e saida mak di’ak ba Estadu no rai partidu ne’e sei fó apoiu.

“Ami sei harre bainhira governu kaer metin programa, planu sira ne’ebé mak mai duni husi planu dezenvolvimentu nasionál no planu estratéjiku dezenvolvimentu nasionál, PD ba Estadu no rai ida ne’e sempre kumpri katak programa ne’ebé ba povu nia moris di’ak sempre apoiu”, dehan tan.

Assanami mós dehan tan PD sei rasionaliza debate no diskusaun orsamentu tanba la’ós dehan oposizaun ona tenke taka dalan ba buat hotu.

“Agora husu atu ita kumpre, tanba povu kiik nia votus ne’e mak nakfilak ba ukun”.

Tuir nia eleisaun hanesan instrumentu atu dignifika povu no Nasaun liuhosi povu nia votu, liu eleisaun lider iha dever atu nafatin defende povu nia interese, PD sei hamrik firme maske ho nain lima.

PD mós apresia ho servisu orgaun eleitorál hanesan CNE no STAE ne’ebé hala’o kna’ar ho professionál mesmu hetan difikuldade maibé timoroan rasik mak organiza prosesu eleitorál hotu, nune’e mós ba PNTL no F-FDTL ninia membru sira ne’ebé hatudu sira ninia profesionalizmu no responsabilidade hodi garante seguransa iha rai laran, ho nune’e povu hotu sente hakmatek hala’o sira nia direitu demokrátiku.

Biban ne’e mós partidu jerasaun hato’o sentimentu triste no solidaridade ba povu Indonézia, liu-liu iha Surabaya, espesiál ba sarani sira ne’ebé hetan atake husi terorista horiseik.

Jornalista: Julia Chatarina | Editora: Rita Almeida

Imajen: Prezidenti Partidu Demokrátiko (PD) Mariano Assanami Sabino