KM Ajusta Ona Orsamentu Adisional Bazeia ba KROP

DILI, (TATOLI) – Governu liuhosi reuniaun Konsellu  Ministru (KM), ohin, (31/10) halo ajustamentu ba proposta adisional ne’ebé antes ne’e Komité Revizaun Orsamentu Polítika (KROP) tuir rezultadu reuniaun kada instituisaun estadu sira nian.

“Ohin Konsellu  Ministru ko’alia  konaba Orsamentu Jerál  Estadu (OJE) 2019, halo ajustamentu balun ba parte adisional sira antes Ministériu Finansa (MF) atu aprezenta proposta final hodi hatún ba Parlamentu Nasionál”, tenik Ministru Estadu Prezidénsia Konsellu  Ministru, Agio Pereira ba jornalista sira hafoin reuniaun ezekutivu iha Palásiu Governu, ohin.

Maski nune’e, Ministru Agio konsidera total montante ba OJE 2019 sei segredu, tanba foin tama iha faze halo ajustamentu.

“Semana oin bele fó sai ona hafoin aprovasaun iha KM,” Agio promete.

Nia informa tan katak, sorumutu konsellu ministru semana ikus fulan Outubru nian, diskute ajenda importante hanesan Reabilitasaun Estrada Baukau-Vikeke hahú Inisiu Tinan 2019.

Tuir nia reniaun ne’ebé prezide hosi Primeiru-Ministru Taur Matan Ruak ho ajenda sira mak hanesan aprezentasaun hosi Ministériu Finansas kona-ba Relatóriu Nasionál Dezenvolvimentu Umanu nian ne’ebé serbisu hamutuk ho Universidade Flinders hosi Austrália no Nasoins Unidas nian ba Dezenvolvimentu. Relatóriu refere foka liu ba situasaun atuál no bein-estar moris joven sira-nian. Rekomendasaun investimentu ne’ebé aprezenta ne’e ko’alia liu kona-ba investimentu oinsá hadi’ak kualidade iha area saúde, edukasaun no ekonomia, hodi oinsá joven sira bele hetan oportunidade.

Ministériu Finansas mós aprezenta planu projetu reabilitasaun no melloramentu estrada Baukau-Vikeke, ne’ebé sei hahú obra iha inisiu tinan 2019 ho prazu tinan tolu ,to’o finál 2021. Orsamentu ba obra refere mai hosi fundu impréstimu hodi Banku Dezenvolvimentu Aziátiku (ADB). Projetu estrada ne’e sei fornese rede ida seguru, viável no ho kualidade alta, ne’ebé sei kontribui postivamente ba reforsa movimentasaun ema no sasán ne’ebé lais no efisiente hodi apoia hasa’e ekonomia komunidade sira ne’ebé benefisia ba estrada refere.

Ministériu Finansas mós halo aprezentasaun badak kona-ba esbosu proposta OJE 2019 nian, tuir rezultadu hosi diskusaun Komité Revizaun Orsamental Polítika (CROP) durante semana ida liu ba, ne’ebé sei aprezenta ba PN iha ínisiu fulan Novembru.

Konsellu Ministru aprova mós Rezolusaun Governu nian kona-ba kontribuisaun Timor-Leste nian ba Fundu Konvensaun Nasoins Unidas nian kona-ba Direitu Tasi (CNUDM), ho valor $250.000, tuir pedidu hosi Xefe Negosiador, Kay Rala Xanana Gusmão iha ámbitu pozisaun Timor-Leste nian atu apoiu “Estadu frazil sira”, ne’ebé hetan problema iha area fronteira tasi nian, ne’ebé iha obstakulu finanseiru atu hetan asesu ba mekanizmu internasionál sira kona-ba oinsá rezolve disputa delimitasaun fronteira sira.

Konsellu Ministru aprova kontribuisaun fundus $180.000 ba Sekretária Estadu Juventude no Desportu (SEJD), atu uza hodi realiza festival desportu, muzikál, kultura no aventura, koñesidu ho naran “Suai Extreme” ne’ebé sei hala’o durante loron 6 nia laran no hotu ho inaugurasaun ofisiál ba auto-estrada dahuluk (sesaun I Suai-Zumalai) iha zona súl. Eventu ne’e sei partisipa hosi timoroan no estranjeiru sira no konsidera nu’udar eventu boot.

Konsellu Ministru rona-mós hosi Banku Nasionál Komérsiu Timor-Leste (BNCTL) proposta ida kona-ba kapitalizasaun finansiamentu hosi Governu ba tinan 2019. Hodi aprezenta gráfiku sira kona-ba evolusaun kresimentu depózitu no kréditu nian, hahú hosi tinan 2011 to’o dadauk ne’e, no mós variasaun seluk kona-ba impréstimu, depózitu no adekuasaun ba kapitál ne’ebé la’o daudaun ne’e ho nia projesaun ba tinan 2019 nian.

Reuniaun Konsellu Ministru ne’e mós, halo aprovasaun ba Lei Orgánika Ministériu sira hanesan, Ministériu Obras Públika (MOP), Ministériu Transporte no Komunikasaun (MTC), Ministériu Saúde (MS), Ministériu Defeza(MD), Ministériu Ensinu Superior, Siénsia no Kultura (MESCC), Ministériu Edukasaun Juventude no Desportu (MEJD), atu fasilita di’ak serbisu ministériu sira refere iha hala’o knaar lorloron.

Jornalista: Julia Chatarina | Editór: Manuel Pinto