Mandatu ba Kargu sira iha Ierarkia F-FDTL “idade reforma no kontinuidade funsaun”

Fundasaun Mahein (FM) 

30 Outobru 2018

Komunikadu Imprensa

Mandatu ba Kargu sira iha Ierarkia F-FDTL “idade reforma no kontinuidade funsaun”

Normalmente exersisiu ba kargu sira iha ierarkia F-FDTL nian, tuir artigu 74 kargu CEMG F-FDTL no Vice-CEMG F-FDTL nia mandatu tinan haat no renova dala ida deit. Nune’e mos kargu CEM F-FDTL no Komandante Komponente sira tuir artigu 75 Decreto-Lei N.o 28/2016 de 13 de Julho Primeira Alteração ao Decreto-Lei N.o 7/2014, de 12 de Março (Estatuto dos Militares das F-FDTL) nia mandatu tinan rua no renova dala ida deit.

Iha kazu ida ne’e, hafoin Vice-Chefe Estado Maoir General F-FDTL (CEMG F-FDTL) Brigadeiro General Filomeno Paixão de Jesus nomea ba Ministru Defeza iha fulan Jullu 2018, kargu Vice-CEMG F-FDTL mamuk durante fulan rua. To’o fulan ikus Setembru 2018 Prezidente Repúblika nomea Brigadeiro General Falur Rate Laek ba kargu Vice-CEMG F-FDTL ho mandatu tinan ida tuir Dekretu Prezidente Repúblika N.o 39/2018 loron 21 Setembru no simu pose iha loron 1 Outobru 2018.

Nomeasaun Brigadeiro General Falur Rate Laek ba kargu Vice-CEMG F-FDTL husik mamuk tan kargu Chefe Estado Maior (CEM) F-FDTL nian. Ikus mai, Prezidente Repúblika nomea Koronel Calisto Santos Coli “Coliati” ba kargu CEM F-FDTL ho mandatu tinan rua tuir Dekretu Prezidente Repúblika N.o 45/2018, loron 23 Outobru 2018 no simu pose iha loron 29 Outobru 2018. Iha tempu hanesan mandatu CEMG F-FDTL ramata ona iha loron 6 Outobru 2018 no to’o agora seidauk halo nomeasaun foun ka rekondusaun. Inklui Komandante Komandante Komponente sira nia mandatu sei ramata iha loron 17 Novembru 2018.

Iha kazu militar sira ne’ebé pasa ba situasaun reforma, tuir n.o 1 artigu 195 Decreto- Lei N.o 28/2016 de 13 de Julho Primeira Alteração ao Decreto-Lei N.o 7/2014, de 12 de Março (Estatuto dos Militares das F-FDTL) hatete militar sira ne’ebé pasa ba situasaun reforma bainhira atinji ona idade tinan 60. Maibe bainhira kontinua exerse funsaun iha ierarkia F-FDTL ho mandatu tinan ida no bele halo renovasaun tan. Naran katak kontinuidade funsaun aprova husi CEMG F-FDTL no Prezidente Repúblika ba kargu CEMG F-FDTL no Vice-CEMG F-FDTL tuir n.o 2 alinea d) no e) artigu 195 nia dispozisaun.

Iha kazu rekondusaun Major General Lere Anan Timur ba kargu CEMG F-FDTL, Vice-CEMG F-FDTL Brigadeiro General Filomeno Paixão de Jesus kada tinan (periodu 2015 – 2016, 2016-2017 no 2017 no 2018) no Brigadeiro General Falur Rate Laek ba kargu atual Vice-CEMG F-FDTL no mandatu iha periodu sira liu ba nu’udar CEM F-FDTL ba mandatu tinan ida. Tamba sira hotu pasa ona ba idade reforma maibe kontinua exerse kargu sira iha ierarkia F-FDTL nian. Maske exersisiu normal ba kargu CEMG F-FDTL, Vice-CEMG F-FDTL tuir artigu 74 kargu CEMG F- FDTL no Vice-CEMG F-FDTL nia mandatu tinan haat no renova dala ida deit. Nune’e mos kargu CEM F-FDTL no Komandante Komponente sira tuir artigu 75 Decreto-Lei N.o 28/2016 de 13 de Julho Primeira Alteração ao Decreto-Lei N.o 7/2014, de 12 de Março (Estatuto dos Militares das F-FDTL) nia mandatu tinan rua no renova dala ida deit.

Kargu CEMG F-FDTL ne’ebé to’o agora seidauk halo nomeasaun foun ka rekondusaun. Posibilidade Prezidente Repúblika bele rekondus nafatin Major General Lere Anan Timur ba kargu CEMG F-FDTL ba tinan ida ka halo nomeasaun foun. Tamba ne’e kompetensia Prezidente Repúblika nian atu halo nomeasaun foun ka rekondusaun. Maske Governu hanesan parte ida ne’ebé hato’o proposta (‘’sob proposta’’), maibe la vinkula direitu Konstitusional Prezidente Repúblika nian (tuir dispozisaun pontu m) artigu 86 Konstitusaun Repúblika Demokratika Timor-Leste, alinea e) artigu 14 Lei Defeza Nasional (Lei N.o 3/2010 Lei Defeza Nasional, loron 21 Abril) no artigu 74 no 75 Decreto-Lei N.o 28/2016 de 13 de Julho Primeira Alteração ao Decreto-Lei N.o 7/2014, de 12 de Março (Estatuto dos Militares das F-FDTL).

Rekomendasaun

1. Prezidente Repúblika no Governu presiza konsidera no hala’o tuir Lei ba mandatu CEMG F-FDTL Major General Lere Anan Timur ne’ebé ramata ona iha loron 6 Outobru 2018. Iha ne’ebé halo nomeasaun foun no exonerasaun ka rekondusaun tuir kompetensia Prezidente Repúblika nian.

2. Ministru Defeza hahu halo konsultasaun no audisaun ho Konsellu Superior Defeza Militar (F-FDTL), atu antisipa prosesu, nomos mandatu ba Komandante Komponente sira ne’ebé sei remata iha loron 17 Novembru 2018.

Atu hetan informasaun kle’an liu kona-bá asuntu ne’e bele kontaktu:

João Almeida Adjuntu Diretor Email: almeidamahein@gmail.com Telemovel: (+670) 7756 1184 ka 7831 6075 Website: www.fundasaunmahein.org