COVID-19: Ministériu Saúde husu kalma ho prevensaun hasoru kazu foun

Iha loron-tersa ne'e, ministériu Saúde husu ona ba populasaun hodi mantén kalma, hafoin hetan kazu foun ida hosi COVID-19, no atu aplika medida sira prevensaun nian, inklui uza máskara sira, fase liman ho distansiamentu fíziku.

"Ami apela ba populasaun hodi labele pániku, hodi mantén medida sira prevensaun ba COVID-19 nian, uza máskara sira, kontinua ho distansiamentu fíziku ho evita akumulasaun ema barak", hatete hosi Narciso Fernandes, visi-kordenador jeral hosi Komisaun Ezekutivu ba COVID-19 hosi ministériu Saúde.

Narciso Fernandes, ne'ebé substitui ministra Saúde iha konferénsia imprensa ne'e tanba motivu servisu nian, esplika ona katak kazu foun konfirmadu hanesan sidadaun indonéziu ida ho tinan 46, ne'ebé tama iha Timor-Leste iha loron 22 Jullu no hatama lalais iha kuarentena iha instalasaun sira Estadu nian iha Díli laran.

Mane ne'e halo viajen ho aviaun hosi Java Sentral ba Kupang, kapital hosi Timor Osidental no hahú hosi fatin ne'e, halo viajen ho karreta, ho grupu ida ema na'in lima, to'o fronteira ho Timor-Leste.

Grupu halo parte hosi ema na'in 105 ne'ebé maka tama legalmente iha fronteira iha loron 22 Jullu, ne'ebé maka tau hamutuk ho ema na'in neen ne'ebé tama ilegal, na'in 83 transfere ona hodi kumpri kuarentena iha instalasaun sira Governu nian (inklui iha Díli) no na'in 28 hodi hala'o auto kuarentena.

Ekipa vijilánsia epidemiolójiku halo ona teste liutiha loron ualu, iha 30 Jullu, konfirma kazu pozitivu.

"Halo hela 'tracing' hosi kontatu diretu sira ho kazu pozitivu. Prátika ne'e hanesan uza baibain", nia refere ho esplika katak mane ne'e transfere ba Sentru Izolamentu Vera Cruz nian.

Informasaun foun sira hosi autoridade indonéziu sira, iha loron-segunda, hatudu katak provínsia Nusa Tenggara Timur, ne'ebé inklui metade indonéziu hosi illa Timor nian, rejista númeru ki'ik hosi kazu sira hosi provínsia tomak iha nasaun, kazu rihun 151 hosi kazu rihun 113 resin ne'ebé maka rejista to'o agora daudaun iha nasaun, ho ema na'in 120 rekupera no vítima mortal na'in ida.

Iha nível global, iha nasaun viziñu iha pasiente rekuperadu hamutuk rihun 70 resin no mate na'in 5.300 resin.

Hatán ba Lusa kona-ba denúnsia sira kona-ba kondisaun sira iha kuarentena iha Tasi Tolu, ne'ebé iha ema na'in 250 resin, no ba prosedimentu sira limpeza nian, prevensaun ho distansiamentu sosial, Narciso Fernandes hatete ona katak Governu sei reforsa regra sira.

Sidadaun timoroan sira ne'ebé iha Tasi Tolu, iha besik Díli, denunsia ba Lusa kona-ba falta hijiene iha kuartu sira, fahe hariis-fatin ho ema na'in 250 no falta ekipamentu sira hosi protesaun pesoal nian hosi funsionáriu barak ne'ebé destakadu iha fatin.

"Maski limitasaun sira, ami serbisu nafatin. Ekipa presiza reforsa aplikasaun hosi regra sira iha kuarentena hodi asegura katak iha nafatin disiplina, hodi hamenus risku hosi parte daruak hosi moras nian", nia hatete.

Informasaun ikus sira hosi Ministériu Saúde hatudu katak agora daudaun iha ema na'in 250 maka iha kuarentena iha instalasaun sira Estadu nian - na'in 212 iha Díli, na'in 31 iha enklave Oecusse no na'in hitu iha Kovalima - ne'ebé tau hamutuk ho na'in 144 iha auto izolamentu, kuaze sira hotu iha Díli.

Governu halo ona teste ho total 4.238, iha final hosi loron-segunda, na'in 167 hein hela rezultadu sira.

Ema na'in 2880 resin maka kompleta ona kuarentena iha Timor-Leste dezde hahú hala'o medida ne'e.

Hahú hosi inísiu pandemia, Timor-Leste rejista ona kazu konfirmadu hamutuk 25, pasiente na'in 24 rekupera ona.

Kazu iha loron-tersa ne'e hanesan kazu dahuluk dezde loron 15 Maiu.

Sapo TL | Lusa